یوں بھی دیکھا نہ کبھی درد کا درماں ہونا

یوں بھی دیکھا نہ کبھی درد کا درماں ہونا

ہائے وہ نشتر مژگاں کا رگ جاں ہونا

وہ تمناؤں کا رہ رہ کے پریشاں ہونا

وہ تری یاد کا دل میں ترے مہماں ہونا

پردے پردے میں ترے وصل کا ساماں ہونا

درد پنہاں کا ترا غمزۂ پنہاں ہونا

محشر ناز ہیں ذرات فضائے کونین

اللہ اللہ کسی کافر کا خراماں ہونا

ہر گھڑی اک نئے عالم کی خبر دیتا ہے

مرا ہنسنا مرا رونا مرا حیراں ہونا

جوش آبادیٔ دنیا سے محبت یعنی

دل حسرت زدہ کا محشر حرماں ہونا

آہ میں ہوں وہ سیہ بخت کہ تقدیر میں تھا

برق سے میرے نشیمن کا چراغاں ہونا

خیر اپنی نہیں تجھ کو یہ کہے دیتا ہے

اپنی ہر ایک ادا پر ترا حیراں ہونا

جلوۂ بزم ازل جلوۂ طور محشر

ہے مرے شوق کے اجزا کا پریشاں ہونا

دیکھیے ناز تغافل کو دکھائے کیا رنگ

اشک حسرت کا سر دامن مژگاں ہونا

وادیٔ معرفت و شوق کے اللہ رے نصیب

جس کی قسمت میں تھا بیخودؔ کا بیاباں ہونا

yun bhi dekha na kabhi dard ka darman hona

hae wo nashtar-e-mizhgan ka rag-e-jan hona

wo tamannaon ka rah rah ke pareshan hona

wo tiri yad ka dil mein tire mehman hona

parde parde mein tire wasl ka saman hona

dard pinhan ka tira ghamza-e-pinhan hona

mahshar-e-naz hain zarrat faza-e-kaunain

allah allah kisi kafir ka khiraman hona

har ghari ik nae alam ki khabar deta hai

mira hansna mira rona mira hairan hona

josh-e-abadi-e-duniya se mohabbat yaani

dil-e-hasrat zada ka mahshar-e-hirman hona

ah mein hun wo siyah bakht ke taqdir mein tha

barq se mere nasheman ka charaghan hona

khair apni nahin tujh ko ye kahe deta hai

apni har ek ada par tira hairan hona

jalwa-e-bazm-e-azal jalwa-e-tur-e-mahshar

hai mire shauq ke ajza ka pareshan hona

dekhiye naz-e-taghaful ko dikhae kiya rang

ashk hasrat ka sar-e-daman-e-mizhgan hona

wadi-e-maarifat-o-shauq ke allah re nasib

jis ki qismat mein tha bekhud ka bayaban hona