یوں بدلتی ہے کہیں برق و شرر کی صورت

یوں بدلتی ہے کہیں برق و شرر کی صورت

قابل دید ہوئی ہے گل تر کی صورت

زلف کی آڑ میں تھی جان نظر کی صورت

رات گزری تو نظر آئی سحر کی صورت

ان کے لب پر ہے تبسم مری آنکھوں میں سرور

کیا دکھائی ہے دعاؤں نے اثر کی صورت

قافلے والو نئے قافلہ سالار آئے

اب بدل جائے گی انداز سفر کی صورت

کیا کرشمہ ہے مرے جذبۂ آزادی کا

تھی جو دیوار کبھی اب ہے وہ در کی صورت

اب کوئی حوصلہ افزائے ہنر ہے اخترؔ

اب نظر آئے گی ارباب ہنر کی صورت

yun badalti hai kahin barq-o-sharar ki surat

qabil-e-did hui hai gul-e-tar ki surat

zulf ki ar mein thi jan nazar ki surat

rat guzri to nazar ai sahar ki surat

un ke lab par hai tabassum miri ankhon mein surur

kya dikhai hai duaon ne asar ki surat

qafile walo nae qafila salar ae

ab badal jaegi andaz-e-safar ki surat

kya karishma hai mire jazba-e-azadi ka

thi jo diwar kabhi ab hai wo dar ki surat

ab koi hausla afza-e-hunar hai akhtar

ab nazar aegi arbab-e-hunar ki surat