یار نے ہم سے بے ادائی کی

یار نے ہم سے بے ادائی کی

وصل کی رات میں لڑائی کی

بال و پر بھی گئے بہار کے ساتھ

اب توقع نہیں رہائی کی

کلفت رنج عشق کم نہ ہوئی

میں دوا کی بہت شفائی کی

طرفہ رفتار کے ہیں رفتہ سب

دھوم ہے اس کی رہ گرائی کی

خندۂ یار سے طرف ہو کر

برق نے اپنی جگ ہنسائی کی

کچھ مروت نہ تھی ان آنکھوں میں

دیکھ کر کیا یہ آشنائی کی

وصل کے دن کو کار جاں نہ کھنچا

شب نہ آخر ہوئی جدائی کی

منہ لگایا نہ دختر رز کو

میں جوانی میں پارسائی کی

جور اس سنگ دل کے سب نہ کھنچے

عمر نے سخت بے وفائی کی

کوہ کن کیا پہاڑ توڑے گا

عشق نے زور آزمائی کی

چپکے اس کی گلی میں پھرتے رہے

دیر واں ہم نے بے نوائی کی

اک نگہ میں ہزار جی مارے

ساحری کی کہ دل ربائی کی

نسبت اس آستاں سے کچھ نہ ہوئی

برسوں تک ہم نے جبہہ سائی کی

میرؔ کی بندگی میں جاں بازی

سیر سی ہو گئی خدائی کی

yar ne ham se be adai ki

wasl ki rat mein larai ki

bal-o-par bhi gae bahar ke sath

ab tawaqqo nahin rihai ki

kulfat-e-ranj-e-ishq kam na hui

main dawa ki bahut shifai ki

turfa raftar ke hain rafta sab

dhum hai us ki rah girai ki

khanda-e-yar se taraf ho kar

barq ne apni jag hansai ki

kuchh murawwat na thi in ankhon mein

dekh kar kya ye ashnai ki

wasl ke din ko kar jan na khincha

shab na akhir hui judai ki

munh lagaya na dukhtar-e-raz ko

main jawani mein parsai ki

jaur is sang dil ke sab na khinche

umr ne sakht be wafai ki

koh kin kya pahar torega

ishq ne zor azmai ki

chupke us ki gali mein phirte rahe

der wan ham ne be nawai ki

ik nigah mein hazar ji mare

sahiri ki ke dil rabai ki

nisbat is astan se kuchh na hui

barson tak ham ne jabha sai ki

mir ki bandagi mein jan bazi

sair si ho gai khudai ki