یار جب ہم کنار ہووے گا

یار جب ہم کنار ہووے گا

دل کو میرے قرار ہووے گا

گزرا مجھ خاک سے جو دامن کش

یہ وہی شہسوار ہووے گا

تاب کیا ماہ چار دہ کو جو ٹک

اس پری سے دو چار ہووے گا

مہر اس رخ کے آگے افسردہ

جوں چراغ مزار ہووے گا

گل نزاکت کے آگے اس رو کے

چشم بلبل میں خار ہووے گا

سرو اس قد راست کے آگے

بندۂ چوب دار ہووے گا

گرچہ عالم میں ہر کوئی تیرا

عاشق غم گسار ہووے گا

یاد کر ہم سا پر نہ کوئی پیارے

فدویٔ جاں نثار ہووے گا

اے جہاں دارؔ کب وہ آئنہ رو

دیکھو مجھ سے دو چار ہووے گا

yar jab ham kanar howe ga

dil ko mere qarar howe ga

guzra mujh khak se jo daman kash

ye wahi shahsawar howe ga

tab kya mah-e-char da ko jo tuk

us pari se do char howe ga

mehr us rukh ke age afsurda

jun charagh-e-mazar howe ga

gul nazakat ke age is ro ke

chashm-e-bulbul mein khar howe ga

sarw is qad-e-rast ke age

banda-e-chob dar howe ga

garche alam mein har koi tera

ashiq-e-gham gusar howe ga

yad kar ham sa par na koi pyare

fidwi-e-jan nisar howe ga

ai jahan dar kab wo aina ro

dekho mujh se do char howe ga