یار کو ہم نے جا بجا دیکھا

یار کو ہم نے جا بجا دیکھا

کہیں ظاہر کہیں چھپا دیکھا

کہیں ممکن ہوا کہیں واجب

کہیں فانی کہیں بقا دیکھا

دید اپنے کی تھی اسے خواہش

آپ کو ہر طرح بنا دیکھا

صورتِ گُل میں کھل کھلا کے ہنسا

شکل بلبل میں چہچہا دیکھا

شمع ہو کر کے اور پروانہ

آپ کو آپ میں جلا دیکھا

کر کے دعویٰ کہیں انالحق کا

بر سرِ دار وہ کھنچا دیکھا

تھا وہ برتر شما و ما سے نیاز

پھر وہی اب شما و ما دیکھا

کہیں ہے بادشاہ تخت نشیں

کہیں کاسہ لئے گدا دیکھا

کہیں عابد بنا کہیں زاہد

کہیں رندوں کا پیشوا دیکھا

کہیں وہ در لباسِ معشوقاں

بر سرِ ناز اور ادا دیکھا

کہیں عاشق نیاز کی صورت

سینہ بریاں و دل جلا دیکھا

yar ko ham ne ja baja dekha

kahin zahir kahin chhupa dekha

kahin mumkin hua kahin wajib

kahin fani kahin baqa dekha

did apne ki thi use khwahish

ap ko har tarah bana dekha

surat-e-gul mein khul khula ke hansa

shakl-e-bulbul mein chahchaha dekha

shama ho kar ke aur parwana

ap ko ap mein jala dekha

kar ke daawa kahin analhaq ka

bar sar-e-dar wo khincha dekha

tha wo bartar shuma-o-ma se niyaz

phir wahi ab shuma-o-ma dekha

kahin hai badshah takht nashin

kahin kasa liye gada dekha

kahin abid bana kahin zahid

kahin rindon ka peshwa dekha

kahin wo dar libas-e-maashuqan

bar sar-e-naz aur ada dekha

kahin ashiq niyaz ki surat

sina-e-buriyan-o-dil jala dekha