یارو نہیں اتنا مجھے قاتل نے ستایا

یارو نہیں اتنا مجھے قاتل نے ستایا

جتنا کہ مرے دشمن جاں دل نے ستایا

کچھ سرزنش کار کا شاکی وہ نہیں ہے

مجنوں کو تو ہے صاحب محمل نے ستایا

غنچہ کہوں یا درج گہر تیرے دہن کو

کھلنا نہیں اس عقدۂ مشکل نے ستایا

آرام سے سویا نہ کمر کا تری کشتہ

مرقد میں بھی موران تہہ گل نے ستایا

اس کا مجھے شب یاد دلایا رخ پر نور

شکل اپنی دکھا کر مہ کامل نے ستایا

میرا دل سودا زدہ کرتا نہ کبھی غل

اس کاکل پیچاں کے سلاسل نے ستایا

افیوں کی کسی روز میں کھا جاؤں گا گولی

بے وجہ رخ یار کے گر تل نے ستایا

جب بوسہ میں مانگوں ہوں تو کیا کہتے ہو منہ پھیر

ایسا تو کسی بھی نہیں سائل نے ستایا

ہر جا متجلی ہے وہ بے پردہ ولیکن

غفلت کے مجھے پردۂ حائل نے ستایا

تھا ایک تو صیاد گرفتار قفس میں

اور دوسرے آواز عنادل نے ستایا

اے ہم سفراں پیش روی کی نہیں طاقت

کیا کیجے ہمیں دورئ منزل نے ستایا

پہلو میں نصیرؔ آہ نہیں ہے دل مضطر

اس شعر غم آلودۂ بے دل نے ستایا

yaro nahin itna mujhe qatil ne sataya

jitna ke mire dushman-e-jan dil ne sataya

kuchh sarzanish kar ka shaki wo nahin hai

majnun ko to hai sahab-e-mahmil ne sataya

ghuncha kahun ya darj guhar tere dahan ko

khulna nahin is uqda-e-mushkil ne sataya

aram se soya na kamar ka tiri kushta

marqad mein bhi moran-e-tah gul ne sataya

us ka mujhe shab yad dilaya rukh pur nur

shakl apni dikha kar mah-e-kamil ne sataya

mera dil sauda zada karta na kabhi ghul

is kakul-e-pechan ke salasil ne sataya

ufiyon ki kisi roz mein kha jaunga goli

be wajh-e-rukh yar ke gar til ne sataya

jab bosa mein mangun hun to kya kahte ho munh pher

aisa to kisi bhi nahin sail ne sataya

har ja mutajalli hai wo be parda walekin

ghaflat ke mujhe parda-e-hail ne sataya

tha ek to sayyad giraftar-e-qafas mein

aur dusre awaz anadil ne sataya

ai ham safaran pesh rawi ki nahin taqat

kya kije hamen duri-e-manzil ne sataya

pahlu mein nasir ah nahin hai dil-e-muztar

is sher gham aluda-e-be dil ne sataya