یار کو محرومِ تماشا کیا

یار کو محرومِ تماشا کیا

مرگِ مفاجات نے یہ کیا کیا

آپ جو ہنستے رہے شب بزم میں

جان کو دشمن کی میں رویا کیا

عرضِ تمنا سے رہا بے قرار

شب وہ مجھے، میں اسے چھیڑا کیا

سرد ہوا دل، وہ ہے غیروں سے گرم

شعلے نے الٹا مجھے ٹھنڈا کیا

مہرِ قمر کا ہے اب ان کو گمان

آہِ فلک سیر نے یہ کیا کیا

ان کو محبت ہی میں شک پڑ گیا

ڈر سے جو شکوہ نہ عدو کا کیا

دیکھئے اب کون ملے خاک میں

یار نے گردوں سے کچھ ایما کیا

حسرتِ آغوش ہے کیوں ہم کنار

غیر سے کب اس نے کنارا کیا

چشمِ عنایت سے بچی جاں مجھے

نرگسِ بیمار نے اچھا کیا

غیر ہی کو چاہیں گے اب شیفتہ

کچھ تو ہے جو یار نے ایسا کیا

yar ko mahrum-e-tamasha kiya

marg-e-mufajat ne ye kya kiya

ap jo hanste rahe shab bazm mein

jan ko dushman ki main roya kiya

arz-e-tamanna se raha be qarar

shab wo mujhe, main use chhera kiya

sard hua dil, wo hai ghairon se garm

shole ne ulta mujhe thanda kiya

mehr-e-qamar ka hai ab un ko guman

ah-e-falak sair ne ye kya kiya

un ko mohabbat hi mein shak par gaya

dar se jo shikwa na adu ka kiya

dekhiye ab kaun mile khak mein

yar ne gardun se kuchh ima kiya

hasrat-e-aghosh hai kyun ham kanar

ghair se kab us ne kinara kiya

chashm-e-inayat se bachi jan mujhe

nargis-e-bimar ne achchha kiya

ghair hi ko chahenge ab shefta

kuchh to hai jo yar ne aisa kiya