یار کو میں نے مجھے یار نے سونے نہ دیا

یار کو میں نے مجھے یار نے سونے نہ دیا

رات بھر طالع بیدار نے سونے نہ دیا

خاک پر سنگ در یار نے سونے نہ دیا

دھوپ میں سایۂ دیوار نے سونے نہ دیا

شام سے وصل کی شب آنکھ نہ جھپکی تا صبح

شادیٔ دولت دیدار نے سونے نہ دیا

ایک شب بلبل بے تاب کے جاگے نہ نصیب

پہلوئے گل میں کبھی خار نے سونے نہ دیا

جب لگی آنکھ کراہا یہ کہ بد خواب کیا

نیند بھر کر دل بیمار نے سونے نہ دیا

درد سر شام سے اس زلف کے سودے میں رہا

صبح تک مجھ کو شب تار نے سونے نہ دیا

رات بھر کیں دل بے تاب نے باتیں مجھ سے

رنج و محنت کے گرفتار نے سونے نہ دیا

سیل گریہ سے مری نیند اڑی مردم کی

فکر بام و در و دیوار نے سونے نہ دیا

باغ عالم میں رہیں خواب کی مشتاق آنکھیں

گرمیٔ آتش گلزار نے سونے نہ دیا

سچ ہے غم خواریٔ بیمار عذاب جاں ہے

تا دم مرگ دل زار نے سونے نہ دیا

تکیہ تک پہلو میں اس گل نے نہ رکھا آتشؔ

غیر کو ساتھ کبھی یار نے سونے نہ دیا

yar ko main ne mujhe yar ne sone na diya

rat bhar tale-e-bedar ne sone na diya

khak par sang dar-e-yar ne sone na diya

dhup mein saya-e-diwar ne sone na diya

sham se wasl ki shab ankh na jhapki ta subh

shadi-e-daulat-e-didar ne sone na diya

ek shab bulbul-e-be tab ke jage na nasib

pahlu-e-gul mein kabhi khar ne sone na diya

jab lagi ankh kiraha ye ke bad khwab kiya

nind bhar kar dil-e-bimar ne sone na diya

dard-e-sar sham se is zulf ke saude mein raha

subh tak mujh ko shab-e-tar ne sone na diya

rat bhar kin dil-e-be tab ne baten mujh se

ranj-o-mehnat ke giraftar ne sone na diya

sail-e-girya se miri nind uri mardum ki

fikr-e-bam-o-dar-o-diwar ne sone na diya

bagh-e-alam mein rahen khwab ki mushtaq ankhen

garmi-e-atish-e-gulzar ne sone na diya

sach hai gham khwari-e-bimar azab-e-jan hai

ta dam-e-marg dil-e-zar ne sone na diya

takiya tak pahlu mein us gul ne na rakha atish

ghair ko sath kabhi yar ne sone na diya