یار کو رغبت اغیار نہ ہونے پائے

یار کو رغبت اغیار نہ ہونے پائے

گل تر کو ہوس خار نہ ہونے پائے

اس میں در پردہ سمجھتے ہیں وہ اپنا ہی گلہ

شکوۂ چرخ بھی زنہار نہ ہونے پائے

فتنۂ حشر جو آنا تو دبے پاؤں ذرا

بخت خفتہ مرا بیدار نہ ہونے پائے

ہائے دل کھول کے کچھ کہہ نہ سکے سوز دروں

آبلے ہم سخن خار نہ ہونے پائے

باغ کی سیر کو جاتے تو ہو پر یاد رہے

سبزہ بیگانہ ہے دو چار نہ ہونے پائے

جمع کر لیجئے غمزوں کو مگر خوبئ بزم

بس وہیں تک ہے کہ بازار نہ ہونے پائے

آپ جاتے تو ہیں اس بزم میں لیکن شبلیؔ

حال دل دیکھیے اظہار نہ ہونے پائے

yar ko raghbat-e-aghyar na hone pae

gul-e-tar ko hawas-e-khar na hone pae

is mein dar parda samajhte hain wo apna hi gila

shikwa-e-charkh bhi zinhar na hone pae

fitna-e-hashr jo ana to dabe paon zara

bakht-e-khufta mira bedar na hone pae

hae dil khol ke kuchh kah na sake soz-e-darun

able ham sukhan-e-khar na hone pae

bagh ki sair ko jate to ho par yad rahe

sabza begana hai do char na hone pae

jama kar lijiye ghamzon ko magar khubi-e-bazm

bas wahin tak hai ke bazar na hone pae

ap jate to hain is bazm mein lekin shabli

hal-e-dil dekhiye izhar na hone pae