الفت عارض لیلیٰ میں پریشاں نکلا

الفت عارض لیلیٰ میں پریشاں نکلا

قیس مانند سحر چاک گریباں نکلا

بن گئے خوب ہدف اس ستم ایجاد کے آپ

لیجئے حضرت دل آج تو ارماں نکلا

نہ ہوئی طاقت نظارہ کسی عاشق کو

شعلۂ حسن حجاب رخ جاناں نکلا

آ گئی صدمۂ فرقت سے اجل عاشق کی

ہجر محبوب فراق جسد و جاں نکلا

روح نے خانۂ تن چھوڑ دیا آخر کار

میزباں ہم جسے سمجھے تھے وہ مہماں نکلا

صاف دل بحر جہاں میں نہیں رکھتے دولت

چشمۂ مہر سے کب گوہر غلطاں نکلا

تو وہ ہے حسن میں یکتا کہ تجسس میں ترے

آسماں لے کے چراغ مہ تاباں نکلا

وہ پری رو ہوا قسمت سے مری میرا مطیع

خط تقدیر خط مہر سلیماں نکلا

میرے مرنے سے ہوئے سیکڑوں ارمان شہید

عالمؔ انجام میں دل گنج شہیداں نکلا

ulfat ariz-e-laila mein pareshan nikla

qais manind-e-sahar chak-e-gareban nikla

ban gae khub hadaf us sitam ijad ke ap

lijiye hazrat-e-dil aj to arman nikla

na hui taqat-e-nazzara kisi ashiq ko

shola-e-husn-e-hijab-e-rukh janan nikla

a gai sadma-e-furqat se ajal ashiq ki

hijr mahbub-e-firaq-e-jasad-o-jan nikla

ruh ne khana-e-tan chhor diya akhir kar

mezban ham jise samjhe the wo mehman nikla

saf dil bahr-e-jahan mein nahin rakhte daulat

chashma-e-mehr se kab gauhar-e-ghaltan nikla

to wo hai husn mein yakta ke tajassus mein tire

asman le ke charagh-e-mah-e-taban nikla

wo pari ru hua qismat se miri mera muti

khat-e-taqdir khat mehr-e-sulaiman nikla

mere marne se hue saikron arman shahid

alam anjam mein dil ganj-e-shahidan nikla