ہے عید لاؤ مے لالہ فام اٹھ اٹھ کر

ہے عید لاؤ مے لالہ فام اٹھ اٹھ کر

گلے لگاتے ہیں شیشوں کو جام اٹھ اٹھ کر

ہوا چلی مری افتادگی کی اے ساقی

گریں گے نشہ میں سب خوش خرام اٹھ اٹھ کر

زمین و عرش و فلک پائمال ہوتے ہیں

نہ جاؤ صحن سے بالائے بام اٹھ اٹھ کر

کوئی بشر نہ ہو مغرور جسم خاکی پر

کہ بیٹھتے ہیں بہت قصر خام اٹھ اٹھ کر

دم سحر نظر آیا ہے کس کا منہ یا رب

صنم جو کرتے ہیں مجھ کو سلام اٹھ اٹھ کر

ذرا اٹھائیے تابوت اپنے عاشق کا

خدا کی راہ کا کرتے ہیں کام اٹھ اٹھ کر

قیامت آئی ہے ہلچل ہے آسمانوں پر

نہ پھریے بہر خدا بام بام اٹھ اٹھ کر

پڑے ہیں پاؤں کی صورت زبان میں گھٹے

یہ قاصدوں کو دئے ہیں پیام اٹھ اٹھ کر

بنے گی شعلۂ جوالہ گردش قسمت

تمہارے گرد پھرے گا غلام اٹھ اٹھ کر

بڑھے گی بات نہ بیٹھیں گے چپکے ہم اے بت

رقیب سے جو کرو گے کلام اٹھ اٹھ کر

رہے گی عاشقوں کے دست و پا میں جب تک حس

تمہاری لیں گے بلائیں مدام اٹھ اٹھ کر

خدا بٹھائے اگر کربلا میں مجھ کو منیرؔ

پھروں میں گرد مزار امام اٹھ اٹھ کر

hai eid lao mai lala fam uth uth kar

gale lagate hain shishon ko jam uth uth kar

hawa chali miri uftadagi ki ai saqi

girenge nasha mein sab khush khiram uth uth kar

zamin-o-arsh-o-falak paimal hote hain

na jao sehn se bala-e-bam uth uth kar

koi bashar na ho maghrur jism-e-khaki par

ke baithte hain bahut qasr-e-kham uth uth kar

dam-e-sahar nazar aya hai kis ka munh ya rab

sanam jo karte hain mujh ko salam uth uth kar

zara uthaiye tabut apne ashiq ka

khuda ki rah ka karte hain kam uth uth kar

qayamat ai hai halchal hai asmanon par

na phiriye bahr-e-khuda bam bam uth uth kar

pare hain paon ki surat zaban mein ghate

ye qasidon ko diye hain payam uth uth kar

banegi shola-e-jawwala gardish-e-qismat

tumhare gard phirega ghulam uth uth kar

barhegi bat na baithenge chupke ham ai but

raqib se jo karoge kalam uth uth kar

rahegi ashiqon ke dast-o-pa mein jab tak his

tumhari lenge balaen mudam uth uth kar

khuda bithae agar karbala mein mujh ko munir

phiron mein gard-e-mazar-e-imam uth uth kar