ہے ماہ کہ آفتاب کیا ہے — غلام علی ہمدانی مصحفی (Mushafi Ghulam Hamdani)

ہے ماہ کہ آفتاب کیا ہے

دیکھو تو تہ نقاب کیا ہے

میں نے تجھے تو نے مجھ کو دیکھا

اب مجھ سے تجھے حجاب کیا ہے

آئے ہو تو کوئی دم تو بیٹھو

اے قبلہ یہ اضطراب کیا ہے

اس بن ہمیں جاگتے ہی گزری

جانا بھی نہ یہ کہ خواب کیا ہے

مجھ کو بھی گنے وہ عاشقوں میں

اس بات کا سو حساب کیا ہے

سیپارۂ دل کو دیکھ اس نے

پوچھا بھی نہ یہ کتاب کیا ہے

اس مے کدۂ جہاں میں یارو

مجھ سا بھی کوئی خراب کیا ہے

قسمت میں ہماری مصحفیؔ ہائے

کیا جانے ثواب عذاب کیا ہے