یا الٰہی مرا دل دار سلامت باشد

یا الٰہی مرا دل دار سلامت باشد

وہ ولی نعمت دیدار سلامت باشد

نیک و بد سے ہے مری خاطر ناشاد آزاد

غم گسار اپنا غم یار سلامت باشد

نہ رکھی دل میں ہمارے طمع خام وصال

رشک اغیار کا آزار سلامت باشد

گر نہ دے شربت عناب مجھے وہ لب لعل

عشوۂ نرگس بیمار سلامت باشد

خاکساروں کا کوئی گو نہ ہوئے پشت پناہ

سر پہ وہ سایۂ دیوار سلامت باشد

اس سگ کو کی نہیں کچھ مجھے مدت سے خبر

وہ مرا یار وفادار سلامت باشد

قتل عاشق کے تئیں گو ہووے یک شہر گواہ

وہ ترا ناز سے انکار سلامت باشد

مرد حق کا رہے دنیا میں علم نام بلند

نہیں منصور اگر دار سلامت باشد

یار کی مہر و مروت پہ نہ رکھ دل حسرتؔ

یہ ترا عشق کا اظہار سلامت باشد

ya ilahi mira dil dar salamat bashad

wo wali nemat-e-didar salamat bashad

nek-o-bad se hai miri khatir-e-nashad azad

gham gusar apna gham-e-yar salamat bashad

na rakhi dil mein hamare tama-e-kham wisal

rashk-e-aghyar ka azar salamat bashad

gar na de sharbat-e-unnab mujhe wo lab laal

ishwa-e-nargis-e-bimar salamat bashad

khaksaron ka koi go na hue pusht panah

sar pe wo saya-e-diwar salamat bashad

is sag ko ki nahin kuchh mujhe muddat se khabar

wo mira yar wafadar salamat bashad

qatl-e-ashiq ke tain go howe yak shahr gawah

wo tira naz se inkar salamat bashad

mard-e-haq ka rahe duniya mein alam nam buland

nahin mansur agar dar salamat bashad

yar ki mehr-o-murawwat pe na rakh dil hasrat

ye tira ishq ka izhar salamat bashad