ہے محبت سب کو اس کے ابروئے خم دار کی

ہے محبت سب کو اس کے ابروئے خم دار کی

ہند میں کیا آبرو باقی رہی تلوار کی

وصل کی شب چاندنی دیوار سے جانے نہ پائے

منتیں کرتا ہوں ہر خار سر دیوار کی

استرا پھرنے سے روئے یار پر ہے دور خط

چال اس کم بخت نے سیکھی ہے کیا پرکار کی

نشۂ مے کا گماں کرنے لگا وہ بدگماں

دیکھ کر سرخی ہمارے دیدۂ خوں بار کی

گھر بھی میرا منتظر ہے یار کا میری طرح

روزن در میں ہے صورت دیدۂ بیدار کی

کہتے ہو ہم خواب میں آتے جو تو سوتا کبھی

خوب کی برباد محنت دیدۂ بیدار کی

باغ عالم میں کہاں ہے کوئی مجھ سا رحم دل

روز کرتا ہوں عیادت نرگس بیمار کی

داغ سر ہیں جوش سودا میں برنگ گل مجھے

مثل گلبن پاؤں میں کب ہے شکایت خار کی

وہ خدا کا دوست ہے اور دوست ہے اس کا خدا

کیوں نہ ہو ناسخؔ محبت حیدر کرار کی

hai mohabbat sab ko us ke abru-e-kham dar ki

hind mein kya abru baqi rahi talwar ki

wasl ki shab chandni diwar se jane na pae

minnaten karta hun har khar-e-sar-e-diwar ki

astara phirne se ru-e-yar par hai daur-e-khat

chal is kam bakht ne sikhi hai kya parkar ki

nasha-e-mai ka guman karne laga wo badguman

dekh kar surkhi hamare dida-e-khun bar ki

ghar bhi mera muntazir hai yar ka meri tarah

rauzan-e-dar mein hai surat dida-e-bedar ki

kahte ho ham khwab mein ate jo tu sota kabhi

khub ki barbad mehnat dida-e-bedar ki

bagh-e-alam mein kahan hai koi mujh sa rahm dil

roz karta hun ayadat nargis-e-bimar ki

dagh-e-sar hain josh-e-sauda mein barang-e-gul mujhe

misl-e-gulban paon mein kab hai shikayat khar ki

wo khuda ka dost hai aur dost hai us ka khuda

kyun na ho nasikh mohabbat haidar-e-karrar ki