ہمدمو لطف شبانہ ہو چکا
خوشی محمد ناظرہمدمو لطف شبانہ ہو چکا
عیش و عشرت کا زمانہ ہو چکا
اب غم و شادی سے آزادی ملی
رنج و راحت کا زمانہ ہو چکا
نجد میں آوارہ کیوں پھرتا ہے قیس
محمل لیلیٰ روانہ ہو چکا
منزل دل میں تھیں کیا کیا حسرتیں
قافلہ یہ بھی روانہ ہو چکا
زندگی غم کی کہانی رہ گئی
عیش کا رنگیں فسانہ ہو چکا
ہو گئی ویراں وہ بزم مے کدہ
دور ساغر کا زمانہ ہو چکا
اب نہیں بزم چمن رنگیں نوا
عندلیبوں کا ترانہ ہو چکا
مطرب ایام نے بدلا ہے ٹھاٹھ
شوق کا چنگ و چغانہ ہو چکا
موج مضطر کو ہوا آخر قرار
شور طوفاں کا زمانہ ہو چکا
ناظرؔ اب ذوق نظر بیکار ہے
منظر ہستی پرانا ہو چکا
hamdamo lutf-e-shabana ho chuka
aish-o-ishrat ka zamana ho chuka
ab gham-o-shadi se azadi mili
ranj-o-rahat ka zamana ho chuka
najd mein awara kyun phirta hai qais
mahmil-e-laila rawana ho chuka
manzil-e-dil mein thin kya kya hasraten
qafila ye bhi rawana ho chuka
zindagi gham ki kahani rah gai
aish ka rangin fasana ho chuka
ho gai wiran wo bazm-e-mai kada
daur-e-saghar ka zamana ho chuka
ab nahin bazm-e-chaman rangin nawa
andalibon ka tarana ho chuka
mutrib-e-ayyam ne badla hai thath
shauq ka chang-o-chughana ho chuka
mauj-e-muztar ko hua akhir qarar
shor-e-tufan ka zamana ho chuka
nazir ab zauq-e-nazar bekar hai
manzar-e-hasti purana ho chuka