ہمارا جذب صادق شوق کامل دیکھتے جاؤ

ہمارا جذب صادق شوق کامل دیکھتے جاؤ

یہیں کھنچ کر چلی آئے گی منزل دیکھتے جاؤ

وفا آموز ہے رشک شہادت آج مقتل میں

ہزاروں ہوں گے بسمل گرد بسمل دیکھتے جاؤ

دم آخر ہے ٹھہرو کرب خود تسکین بنتا ہے

ہوئی جاتی ہے اب آسان مشکل دیکھتے جاؤ

جن آنکھوں سے ابھی تصویر راحت تم نے دیکھی ہے

انہیں آنکھوں سے خون حسرت دل دیکھتے جاؤ

دلم شد خون خوں شد اشک اشک از دیدہ بیروں شد

محبت کا ثمر الفت کا حاصل دیکھتے جاؤ

تمہیں دشمن سمجھ کر بھی تمہیں پر جان دیتا ہوں

مری ہمت مری جرأت مرا دل دیکھتے جاؤ

کوئی بد ظن نہ ہو اور خاتمہ با لخیر ہو جائے

بہ انداز تغافل سوئے بسمل دیکھتے جاؤ

نہ گم کر دے کہیں وارفتگی اے قافلہ والو

مجھے ہر گام پر منزل بمنزل دیکھتے جاؤ

انہیں بے چین کر دیں گی فلک کو بھی جلا دیں گی

منیرؔ آہوں کا اپنی زعم باطل دیکھتے جاؤ

hamara jazb-e-sadiq shauq kamil dekhte jao

yahin khinch kar chali aegi manzil dekhte jao

wafa amoz hai rashk-e-shahadat aj maqtal mein

hazaron honge bismil gard-e-bismil dekhte jao

dam-e-akhir hai thahro karb-e-khud taskin banta hai

hui jati hai ab asan mushkil dekhte jao

jin ankhon se abhi taswir rahat tum ne dekhi hai

unhen ankhon se khun-e-hasrat-e-dil dekhte jao

dalam shud khun-e-khun shud ashk ashk az dida berun shud

mohabbat ka samar ulfat ka hasil dekhte jao

tumhen dushman samajh kar bhi tumhen par jan deta hun

miri himmat miri jurat mira dil dekhte jao

koi bad zan na ho aur khatima ba lakher ho jae

ba andaz-e-taghaful su-e-bismil dekhte jao

na gum kar de kahin waraftagi ai qafila walo

mujhe har gam par manzil bamanzil dekhte jao

unhen be chain kar dengi falak ko bhi jala dengi

munir ahon ka apni zaam-e-batil dekhte jao