ہمارے زخم کی کیا فکر چارہ جو کرتے

ہمارے زخم کی کیا فکر چارہ جو کرتے

تمہیں نے چاک کیا ہے تمہیں رفو کرتے

چمن میں آپ سے وہ کھل کے گفتگو کرتے

یہ منہ گلوں کا کہ دعوائے رنگ و بو کرتے

ملا کے آنکھ وہ ہم سے جو گفتگو کرتے

تو ہم بھی کھل کے ذرا شرح آرزو کرتے

ہمارے آئنۂ دل سے کوئی بحث نہ تھی

تم اپنے مد مقابل سے گفتگو کرتے

یہ بات ایسی تھی ہم منہ بھی چومتے جاتے

وہ پاس بیٹھ کے یوں شکوۂ عدو کرتے

خیال غیر سے دل ٹکڑے ٹکڑے ہو جاتا

ہمارے سامنے دامن اگر رفو کرتے

یہ لفظ وہ ہے معمہ کبھی نہ حل ہوتا

تمام عمر اگر شرح آرزو کرتے

تلاش یار میں مجھ سے بھی دو قدم آگے

نکل گئے ہیں مرے اشک جستجو کرتے

قیامت آئے نہ کیوں قبر پر سبو بر دوش

ازل کے مست اٹھے ہیں سبو سبو کرتے

گرے ہوئے تھے ہماری ہی آنکھ سے صفدرؔ

ان آنسوؤں کی وہ کیا خاک آبرو کرتے

hamare zakhm ki kya fikr chara jo karte

tumhen ne chak kiya hai tumhen rafu karte

chaman mein ap se wo khul ke guftugu karte

ye munh gulon ka ke daawae rang-o-bu karte

mila ke ankh wo ham se jo guftugu karte

to ham bhi khul ke zara sharh-e-arzu karte

hamare aina-e-dil se koi bahs na thi

tum apne mad-e-muqabil se guftugu karte

ye bat aisi thi ham munh bhi chumte jate

wo pas baith ke yun shikwa-e-adu karte

khayal-e-ghair se dil tukre tukre ho jata

hamare samne daman agar rafu karte

ye lafz wo hai muamma kabhi na hal hota

tamam umr agar sharh-e-arzu karte

talash-e-yar mein mujh se bhi do qadam age

nikal gae hain mire ashk justuju karte

qayamat ae na kyun qabr par subu bar dosh

azal ke mast uthe hain subu subu karte

gire hue the hamari hi ankh se safdar

un ansuon ki wo kya khak abru karte