ہمارے سامنے کچھ ذکر غیروں کا اگر ہوگا

ہمارے سامنے کچھ ذکر غیروں کا اگر ہوگا

بشر ہیں ہم بھی صاحب دیکھیے ناحق کا شر ہوگا

نہ مڑ کر تو نے دیکھا اور نہ میں تڑپا نہ خنجر

نہ دل ہووے گا تیرا سا نہ میرا سا جگر ہوگا

میں کچھ مجنوں نہیں ہوں جو کہ صحرا کو چلا جاؤں

تمہارے در سے سر پھوڑوں گا سودا بھی اگر ہوگا

چمن میں لائی ہوگی تو صبا مشاطگی کر کے

جو گل سے آگے لپٹا ہے کسی بلبل کا پر ہوگا

تری کا بھی وہی مالک ہے جو مالک ہے خشکی کا

مددگار اپنا ہر مشکل میں شاہ بحر و بر ہوگا

تصور زلف کا گر چھوڑ دوں مژگاں کا کھٹکا ہے

جو سر کے درد سے فرصت ملی درد جگر ہوگا

طبیبو تم عبث آئے میں کشتہ ہوں فرنگن کا

مری تدبیر کرنے کو مقرر ڈاکٹر ہوگا

کسی کو کوستے کیوں ہو دعا اپنے لیے مانگو

تمہارا فائدہ کیا ہے جو دشمن کا ضرر ہوگا

مزا آئے گا دیوانوں کی باتوں میں پری زادو

جو آغاؔ کا کسی دن دشت مجنوں میں گزر ہوگا

hamare samne kuchh zikr ghairon ka agar hoga

bashar hain ham bhi sahab dekhiye nahaq ka shar hoga

na mur kar tu ne dekha aur na main tarpa na khanjar

na dil howe ga tera sa na mera sa jigar hoga

main kuchh majnun nahin hun jo ke sahra ko chala jaun

tumhare dar se sar phorunga sauda bhi agar hoga

chaman mein lai hogi to saba mashshatagi kar ke

jo gul se age lipta hai kisi bulbul ka par hoga

tiri ka bhi wahi malik hai jo malik hai khushki ka

madadgar apna har mushkil mein shah-e-bahr-o-bar hoga

tasawwur zulf ka gar chhor dun mizhgan ka khatka hai

jo sar ke dard se fursat mili dard-e-jigar hoga

tabibo tum abas ae mein kushta hun farnagn ka

miri tadbir karne ko muqarrar daktar hoga

kisi ko koste kyun ho dua apne liye mango

tumhara faida kya hai jo dushman ka zarar hoga

maza aega diwanon ki baton mein pari zado

jo agha ka kisi din dasht-e-majnun mein guzar hoga