ہماری اس وفا پر بھی دغا کی

ہماری اس وفا پر بھی دغا کی

قسم کھائی تھی او کافر خدا کی

وہ مشت استخواں ہوں اے سگ یار

اگر کھائے سعادت ہے ہما کی

لب شیریں کا جو بوسہ لیا تھا

مری اس کی شکر رنجی رہا کی

وفا سے میں نے بھی اب ہاتھ اٹھایا

قسم ہے مجھ کو اپنے بے وفا کی

ہوئی گر صلح بھی تو بھی رہے جنگ

ملا جب دل تو آنکھ اس سے لڑا کی

فقیروں کے قدم لیتے ہیں سلطاں

یہ ہے تاثیر نقش بوریا کی

تصور بندھ گیا جب اس مژہ کا

تو پہروں دل پہ برچھی سی لگا کی

خدا یوں جس کو چاہے دے سعادت

وگرنہ سگ میں خصلت ہے ہما کی

نہیں اٹھتا ہے سر سجدے سے میرا

مگر ہے سجدہ گاہ اس خاک پا کی

کہوں جب میں کہ بے تیرے ہوں مرتا

تو کہتا ہے وہ بت مرضی خدا کی

نہ آیا منتوں سے یار جس دم

تو پھر کیا کیا اجل کے التجا کی

hamari is wafa par bhi dagha ki

qasam khai thi o kafir khuda ki

wo musht-e-ustukhwan hun ai sag-e-yar

agar khae saadat hai huma ki

lab-e-shirin ka jo bosa liya tha

miri us ki shakar ranji raha ki

wafa se main ne bhi ab hath uthaya

qasam hai mujh ko apne be wafa ki

hui gar sulh bhi tu bhi rahe jang

mila jab dil to ankh us se lara ki

faqiron ke qadam lete hain sultan

ye hai tasir naqsh-e-boriya ki

tasawwur bandh gaya jab is mizha ka

tu pahron dil pe barchhi si laga ki

khuda yun jis ko chahe de saadat

wagarna sag mein khaslat hai huma ki

nahin uthta hai sar sajde se mera

magar hai sajda gah is khak-e-pa ki

kahun jab main ke be tere hun marta

tu kahta hai wo but marzi khuda ki

na aya minnaton se yar jis dam

to phir kya kya ajal ke iltija ki