ہمیں آمد میرؔ کل بھا گئی

ہمیں آمد میرؔ کل بھا گئی

طرح اس میں مجنوں کی سب پا گئی

کہاں کا غبار آہ دل میں یہ تھا

مری خاک بدلی سی سب چھا گئی

کیا پاس بلبل خزاں نے نہ کچھ

گل و برگ بے درد پھیلا گئی

ہوئی سامنے یوں تو ایک ایک کے

ہمیں سے وہ کچھ آنکھ شرما گئی

جگر منہ تک آتے نہیں بولتے

غرض ہم بھی کرتے ہیں کیا کیا گئی

نہ ہم رہ کوئی نا کسی سے گیا

مری لاش تا گور تنہا گئی

گھٹا شمع ساں کیوں نہ جاؤں چلا

طبع غم جگر کو مرے کھا گئی

کوئی رہنے والی ہے جان عزیز

گئی گر نہ امروز فردا گئی

کیے دست و پا گم جو میرؔ آ گیا

وفا پیشہ مجلس اسے پا گئی

hamen amad-e-mir kal bha gai

tarah is mein majnun ki sab pa gai

kahan ka ghubar ah dil mein ye tha

miri khak badli si sab chha gai

kiya pas bulbul khizan ne na kuchh

gul-o-barg-e-be dard phaila gai

hui samne yun to ek ek ke

hamen se wo kuchh ankh sharma gai

jigar munh tak ate nahin bolte

gharaz ham bhi karte hain kya kya gai

na ham rah koi na kisi se gaya

miri lash ta gor tanha gai

ghata shama san kyun na jaun chala

tab-e-gham-e-jigar ko mire kha gai

koi rahne wali hai jan-e-aziz

gai gar na imroz farda gai

kiye dast-o-pa gum jo mir a gaya

wafa pesha majlis use pa gai