ہمارے آگے ترا جب کسو نے نام لیا

ہمارے آگے ترا جب کسو نے نام لیا

دل ستم زدہ کو ہم نے تھام تھام لیا

قسم جو کھائیے تو طالع زلیخا کی

عزیز مصر کا بھی صاحب اک غلام لیا

خراب رہتے تھے مسجد کے آگے مے خانے

نگاہ مست نے ساقی کی انتقام لیا

وہ کج روش نہ ملا راستے میں مجھ سے کبھی

نہ سیدھی طرح سے ان نے مرا سلام لیا

مزا دکھاویں گے بے رحمی کا تری صیاد

گر اضطراب اسیری نے زیر دام لیا

مرے سلیقے سے میری نبھی محبت میں

تمام عمر میں ناکامیوں سے کام لیا

اگرچہ گوشہ گزیں ہوں میں شاعروں میں میرؔ

پہ میرے شور نے روئے زمیں تمام لیا

hamare age tira jab kisu ne nam liya

dil-e-sitam zada ko ham ne tham tham liya

qasam jo khaiye to tale-e-zulekha ki

aziz-e-misr ka bhi sahab ik ghulam liya

kharab rahte the masjid ke age mai khane

nigah-e-mast ne saqi ki intiqam liya

wo kaj rawish na mila raste mein mujh se kabhi

na sidhi tarah se un ne mira salam liya

maza dikhawenge be rahmi ka tiri sayyad

gar iztirab-e-asiri ne zer-e-dam liya

mire saliqe se meri nibhi mohabbat mein

tamam umr mein nakamiyon se kam liya

agarche gosha guzin hun main shayaron mein mir

pe mere shor ne ru-e-zamin tamam liya