ہمیں دیکھے سے وہ جیتا ہے اور ہم اس پہ مرتے تھے

ہمیں دیکھے سے وہ جیتا ہے اور ہم اس پہ مرتے تھے

یہی راتیں تھیں اور باتیں تھیں وہ دن کیا گزرتے تھے

وہ سوز دل سے بھر لاتا تھا اشک سرخ آنکھوں میں

اگر ہم جی کی بے چینی سے آہ سرد بھرتے تھے

کسی دھڑکے سے روتے تھے جو باہم وصل کی شب کو

وہ ہم کو منع کرتا تھا ہم اس کو منع کرتے تھے

ملی رہتی تھیں آنکھیں غلبۂ الفت سے آپس میں

نہ خوف اس کو کسی کا تھا نہ ہم لوگوں سے ڈرتے تھے

سو اب صد حیف اس خورشید رو کے ہجر میں جرأتؔ

یہی راتیں ہیں اور باتیں ہیں وہ دن کیا گزرتے تھے

hamen dekhe se wo jita hai aur ham us pe marte the

yahi raten thin aur baten thin wo din kya guzarte the

wo soz-e-dil se bhar lata tha ashk-e-surkh ankhon mein

agar ham ji ki be chini se ah-e-sard bharte the

kisi dharke se rote the jo baham wasl ki shab ko

wo ham ko mana karta tha ham us ko mana karte the

mili rahti thin ankhen ghalba-e-ulfat se apas mein

na khauf us ko kisi ka tha na ham logon se darte the

so ab sad haif is khurshid ru ke hijr mein jurat

yahi raten hain aur baten hain wo din kya guzarte the