ہاں ساقیٔ مستانہ بھر دے مرا پیمانہ

ہاں ساقیٔ مستانہ بھر دے مرا پیمانہ

گھنگھور گھٹا ہے یا اڑتا ہوا مے خانہ

ہوتی ہیں شب غم میں یوں دل سے مری باتیں

جس طرح سے سمجھائے دیوانے کو دیوانہ

کیا تم نے کہا دل سے کیا دل نے کہا ہم سے

بیٹھو تو سنائیں ہم اک روز یہ افسانہ

غصہ میں جو دی گالی منہ چوم لیا میں نے

ظالم نے کہا یہ کیا میں نے کہا جرمانہ

مطرب سے یہ کہتا تھا حشرؔ اپنی غزل سن کر

ہے میری جوانی کا بھولا ہوا افسانہ

han saqi-e-mastana bhar de mira paimana

ghanghor ghata hai ya urta hua mai khana

hoti hain shab-e-gham mein yun dil se miri baten

jis tarah se samjhae diwane ko diwana

kya tum ne kaha dil se kiya dil ne kaha ham se

baitho to sunaen ham ik roz ye afsana

ghussa mein jo di gali munh chum liya main ne

zalim ne kaha ye kiya main ne kaha jurmana

mutrib se ye kahta tha hashr apni ghazal sun kar

hai meri jawani ka bhula hua afsana