ہاں درد نہاں رنگ کی تعبیر سے پوچھو

ہاں درد نہاں رنگ کی تعبیر سے پوچھو

دل پر جو لگی چوٹ وہ تاثیر سے پوچھو

آئین وفا طوق گلو گیر سے پوچھو

تمکین جنوں پاؤں کی زنجیر سے پوچھو

ناموس محبت کی قیامت کو خبر کیا

تم میری تباہی مری تقدیر سے پوچھو

لو سحر نظر مدعی غارت دل ہے

کیا پوچھتے ہو شوخیٔ تقریر سے پوچھو

مانا کہ مجھے زہر پلانے کی ہے تدبیر

پہلے مری محرومیٔ تقدیر سے پوچھو

کچھ ناز ہے اک تازہ ہوس پر مجھے دیکھو

کچھ یاس ہے بگڑی ہوئی تدبیر سے پوچھو

تم چین سے بیٹھے ہو حوادث کی خبر کیا

نیرنگ جہاں گردش تقدیر سے پوچھو

شوخی سے وہاں رنگ سخن جم نہیں سکتا

تمکیں میں ہے جو بات وہ تصویر سے پوچھو

کافی ہے وہاں راز محبت کو اشارا

تقریر نہیں پردۂ تحریر سے پوچھو

کیا جانے کوئی زلزلہ ساعت محشر

لو آؤ ادھر عاشق دلگیر سے پوچھو

بیگانہ و بے درد ہیں ارباب تماشا

تو حلقۂ فتراک کو نخچیر سے پوچھو

پھر میں ہوں وفا اور وہی آغاز تمنا

انجام کو ناکامی تقدیر سے پوچھو

han dard-e-nihan rang ki taabir se puchho

dil par jo lagi chot wo tasir se puchho

ain-e-wafa tauq-e-galo gir se puchho

tamkin-e-junun paon ki zanjir se puchho

namus-e-mohabbat ki qayamat ko khabar kya

tum meri tabahi miri taqdir se puchho

lo sehr nazar muddai-e-gharat dil hai

kya puchhte ho shokhi-e-taqrir se puchho

mana ke mujhe zahr pilane ki hai tadbir

pahle miri mahrumi-e-taqdir se puchho

kuchh naz hai ik taza hawas par mujhe dekho

kuchh yas hai bigri hui tadbir se puchho

tum chain se baithe ho hawadis ki khabar kya

nairang-e-jahan gardish-e-taqdir se puchho

shokhi se wahan rang-e-sukhan jam nahin sakta

tamkin mein hai jo bat wo taswir se puchho

kafi hai wahan raz-e-mohabbat ko ishara

taqrir nahin parda-e-tahrir se puchho

kya jane koi zalzala saat mahshar

lo ao idhar ashiq-e-dilgir se puchho

begana-o-be dard hain arbab-e-tamasha

tu halqa-e-fitrak ko nakhchir se puchho

phir main hun wafa aur wahi aghaz-e-tamanna

anjam ko nakami taqdir se puchho