السلام اے کام جان مصطفےٰؐ

السلام اے کام جان مصطفےٰؐ

السلام اے یادگار مرتضےٰ

السلام اے مقصد خیرالنسا

السلام اے پیشواے دوسرا

کیا ستم ہے خیمے دریا پر ہوئے

اور بے جاں پانی پانی کر ہوئے

لب نہ اک قطرے سے تیرے تر ہوئے

السلام اے تشنہ کام کربلا

زندگانی کی ہے تونے کیا کٹھن

آ مدینے سے ہوا غربت وطن

مر گئے پر اب نہ تربت نے کفن

السلام اے کشتۂ تیغ جفا

چارہ گر سب تیرے بیچارے گئے

دونوں بیٹے کیا ترے پیارے گئے

یار بھائی سب ترے مارے گئے

السلام اے بیکس دشت وغا

گھر ترا یک بار ویراں ہوگیا

دم نہ مارا گوکہ بے جاں ہوگیا

خاک سے مل کر تو یکساں ہوگیا

السلام اے رفتۂ راہ رضا

ماجرا تیرا نہایت ہے شگرف

رنج میں طاقت ہوئی سب تیری صرف

خوں ہوا دل پر نہ نکلا منھ سے حرف

السلام اے غنچۂ باغ حیا

شان کیا کیسی امارت تیرے بعد

ہوگیا اسباب غارت تیرے بعد

پچھلوں کی اب ہے حقارت تیرے بعد

السلام اے لائق مدح و ثنا

گوش زد ایسا نہیں ظلم عیاں

طعن کے ہمراہ پھر تیغ و سناں

غم سا تیرا غم ہو تو کریے بیاں

السلام اے مبتلاے صدبلا

کس جگہ آیا کہ یوں حیراں ہوا

کن سیہ کاسوں کا تو مہماں ہوا

کس قدر محتاج آب و ناں ہوا

السلام اے خلق کے حاجت روا

تجھ سے خوبی امامت چارچند

تیرا رایت تھا ولایت میں بلند

تیرے در کا ہر گدا اقبال مند

السلام اے شاہ اقلیم ولا

تیرے سجدے میں سدا اہل یقیں

صبح خیزوں کی ترے در پر جبیں

وائے شامی جن کو تجھ سے بغض و کیں

السلام اے قبلۂ اہل صفا

حیف تو افسوس تو اے آہ تو

نے نے رحمت تو زہے تو واہ تو

جی سے گذرا فی سبیل اللہ تو

السلام اے عاشق طرز فنا

سانحہ تیرا بھی یاں ہے یادگار

دل جگر لے کر گیا دونوں فگار

اک پسر چھوڑا ہے سو بیمار و زار

السلام اے دردمندوں کی دوا

دل کو تیری آرزو ہر صبح و شام

جی کو تیری ہی تمنا ہے مدام

جان و دل صدقے کیے حاصل کلام

السلام اے جان و دل کے مدعا

چشم رکھیں تجھ سے سب درویش و شاہ

کج رکھیں تیرے بھروسے پر کلاہ

آفتاب حشر سے دے تو پناہ

السلام اے سایۂ لطف خدا

میرؔ داخل ظلم کے ماروں میں ہے

یعنی تیرے تعزیت داروں میں ہے

مرحمت کر گو گنہگاروں میں ہے

السلام اے شافع روز جزا

alssalam ai kam jan-e-mustafae

alssalam ai yadgar-e-martaze

alssalam ai maqsad-e-khairulnnisa

alssalam ai peshoai dusra

kya sitam hai kheme dariya par hue

aur be jan pani pani kar hue

lab na ik qatre se tere tar hue

alssalam ai tishna kam karbala

zindagani ki hai tune kya kathin

a madine se hua ghurbat watan

mar gae par ab na turbat ne kafan

alssalam ai kushta-e-tegh-e-jafa

chara gar sab tere bechare gae

donon bete kya tire pyare gae

yar bhai sab tire mare gae

alssalam ai bekas dasht-e-wagha

ghar tira yak bar wiran hogaya

dam na mara goke be jan hogaya

khak se mil kar to yaksan hogaya

alssalam ai rafta-e-rah-e-raza

majra tera nihayat hai shagraf

ranj mein taqat hui sab teri sirf

khun hua dil par na nikla munh se harf

alssalam ai ghuncha-e-bagh-e-haya

shan kya kaisi amarat tere baad

hogaya asbab gharat tere baad

pichhlon ki ab hai hiqarat tere baad

alssalam ai laiq-e-madh-o-sana

gosh zad aisa nahin zulm-e-ayan

taan ke hamrah phir tegh-o-sinan

gham sa tera gham ho to kariye bayan

alssalam ai mubtala-e-sadbala

kis jagah aya ke yun hairan hua

kin siyah kason ka to mehman hua

kis qadar mohtaj-e-ab-o-nan hua

alssalam ai khalq ke hajat rawa

tujh se khubi imamat charchand

tera rayat tha wilayat mein buland

tere dar ka har gada iqbal mand

alssalam ai shah iqlim-e-wala

tere sajde mein sada ahl-e-yaqin

subh khezon ki tire dar par jabin

wae shami jin ko tujh se bughz-o-kin

alssalam ai qibla-e-ahl-e-safa

haif to afsos to ai ah to

ne ne rahmat to zahe to wah to

ji se gazra fi sabil-e-allah to

alssalam ai ashiq-e-tarz-e-fana

saneha tera bhi yan hai yadgar

dil jigar le kar gaya donon figar

ik pisar chhora hai so bimar-o-zar

alssalam ai dardmandon ki dawa

dil ko teri arzu har subh-o-sham

ji ko teri hi tamanna hai mudam

jan-o-dil sadqe kiye hasil kalam

alssalam ai jan-o-dil ke muddaa

chashm rakhen tujh se sab darwesh-o-shah

kaj rakhen tere bharose par kulah

aftab-e-hashr se de to panah

alssalam ai saya-e-lutf-e-khuda

mir-e-dakhil zulm ke maron mein hai

yaani tere taaziyat daron mein hai

marhamat kar go gunahgaron mein hai

alssalam ai shafe-e-roz-e-jaza