ہاتھ ملواتی ہیں حوروں کو تمہاری چوڑیاں

ہاتھ ملواتی ہیں حوروں کو تمہاری چوڑیاں

پیاری پیاری ہے کلائی پیاری پیاری چوڑیاں

بند کر دیتی ہیں سب کو پیاری پیاری چوڑیاں

بولتی ہیں لاکھ میں بڑھ کر تمہاری چوڑیاں

اے بتو سرکش اگر ہو آتش رنگ حنا

شعلۂ جوالہ بن جائیں تمہاری چوڑیاں

برہمی حلقہ بگوشوں کی انہیں منظور ہے

پھوٹ ڈلواتی ہیں لاکھوں میں تمہاری چوڑیاں

حوروں کی آنکھوں کے حلقے اے پری موجود ہیں

ان بتانوں سے چڑھاؤ پیاری پیاری چوڑیاں

دل میں چھید کر خون کی بوندوں سے ہر ریزہ بھرے

ٹوٹ کر بن جائیں بوندے کی کٹاری چوڑیاں

سرو قامت ہیں ہزاروں دام الفت میں اسیر

طوق قمری ہیں تمہاری پیاری پیاری چوڑیاں

صدقے ہوتی ہیں برابر ان کلائی پہنچوں پر

گرد پھرتی ہیں خوشی سے باری باری چوڑیاں

دست نازک نے زمانے کو کیا حلقہ بگوش

کیا کھلے بندوں نظر آئیں تمہاری چوڑیاں

اے فلک ان کو نہیں بھاتا ستاروں کا بھی جوڑ

کہتے ہیں میری بلا پہنے کنواری چوڑیاں

روئے روشن پر جو تم نے ہاتھ رکھا ناز سے

چاند کا ہالہ نظر آئیں تمہاری چوڑیاں

حوریں بھیجیں گی تجھے اے رشک گل فردوس سے

لائے گی مشاطہ فصل بہاری چوڑیاں

کیوں نہ نکلے نوک خوں ریزی کے ہر انداز میں

لوٹ کر بھی دل میں چبھتی ہیں تمہاری چوڑیاں

بل نکالا سیکڑوں بانکوں کا دست ناز سے

بانک کے فن میں ہوئیں یکتا تمہاری چوڑیاں

خون کی بوندیں بنی ہیں چننیاں یاقوت کی

دل میں چبھ کر دے رہی ہیں زخم کاری چوڑیاں

کیوں نہ ہوں حلقہ بگوش آ کر حسینان بہشت

حوروں کے کانوں کی بالی ہیں تمہاری چوڑیاں

میں نے ہاتھا پائی جب کی سرد مہرے سے کہا

گرم جوشی سے ہوئیں ٹھنڈی ہماری چوڑیاں

دیکھ لو اے گل رخو مرغان دل پابند ہیں

بال کے پھندے کی صورت ہیں تمہاری چوڑیاں

کرتے ہیں اپنے زبانوں میں ترے ہاتھوں کا وصف

بولتی ہیں ایک منہ ہو کر ستاری چوڑیاں

ہر ستارے کی چمک نور جہان حسن ہے

رکھتی ہیں حکم جہانگیری تمہاری چوڑیاں

جان پڑ جاتی ہے دست ناز سے ہر چیز میں

رنگ بن کر چڑھتی ہیں ہاتھوں میں ساری چوڑیاں

گو گہر ہو اے پری ناز نگاہ حور کا

عینک رضواں کی حلقہ ہیں تمہاری چوڑیاں

کر کے ہاتھا پائی ڈولی میں کیا ان کو سوار

صاف ٹھنڈی ہو گئیں وقت سواری چوڑیاں

بوندوں کے حلقے نہیں پڑتے ہیں اے گل نہر میں

ڈالتا ہے ہندو ابر بہاری چوڑیاں

خون لاکھوں کا کیا کرتے ہیں ہر جھنکار سے

خوب سچا جوڑ چلتی ہیں تمہاری چوڑیاں

غیر ڈیوڑھی پر کیا کرتے ہیں آرائش کا ذکر

حلقۂ بیرون در ٹھہری تمہاری چوڑیاں

ناز سے فرماتے ہیں لوں کس طرح تیرا سلام

ہاتھ اٹھ سکتے نہیں ایسی ہیں بھاری چوڑیاں

اتری پڑتی ہیں پھسل کر دست نازک سے مدام

کس طرح ٹھہریں کلائی میں تمہاری چوڑیاں

مار ڈالا آتش غم نے جلا کر اے منیرؔ

ٹھنڈی کر دیں سوگ میں اس گل نے ساری چوڑیاں

hath malwati hain huron ko tumhari chauriyan

pyari pyari hai kalai pyari pyari chauriyan

band kar deti hain sab ko pyari pyari chauriyan

bolti hain lakh mein barh kar tumhari chauriyan

ai buto sarkash agar ho atish-e-rang-e-hina

shola-e-jawwala ban jaen tumhari chauriyan

barhami halqa bagoshon ki unhen manzur hai

phut dalwati hain lakhon mein tumhari chauriyan

huron ki ankhon ke halqe ai pari maujud hain

in butanon se charhao pyari pyari chauriyan

dil mein chhed kar khun ki bundon se har reza bhare

tut kar ban jaen bunide ki katari chauriyan

sarw-e-qamat hain hazaron dam-e-ulfat mein asir

tauq-e-qumri hain tumhari pyari pyari chauriyan

sadqe hoti hain barabar un kalai pahunchon par

gard phirti hain khushi se bari bari chauriyan

dast-e-nazuk ne zamane ko kiya halqa bagosh

kya khule bandon nazar aen tumhari chauriyan

ai falak un ko nahin bhata sitaron ka bhi jor

kahte hain meri bala pahne kunwari chauriyan

ru-e-raushan par jo tum ne hath rakha naz se

chand ka hala nazar aen tumhari chauriyan

huren bhejengi tujhe ai rashk-e-gul firdaus se

laegi mashshata fasl-e-bahari chauriyan

kyun na nikle nok-e-khun rezi ke har andaz mein

laut kar bhi dil mein chubhti hain tumhari chauriyan

bal nikala saikron bankon ka dast-e-naz se

bank ke fan mein huin yakta tumhari chauriyan

khun ki bunden bani hain chunniyan yaqut ki

dil mein chubh kar de rahi hain zakhm-e-kari chauriyan

kyun na hun halqa bagosh a kar hasinan-e-bahisht

huron ke kanon ki bali hain tumhari chauriyan

main ne hatha pai jab ki sard mohre se kaha

garm joshi se huin thandi hamari chauriyan

dekh lo ai gul rakhw murghan-e-dil paband hain

bal ke phande ki surat hain tumhari chauriyan

karte hain apne zabanon mein tire hathon ka wasf

bolti hain ek munh ho kar sitari chauriyan

har sitare ki chamak nur-e-jahan-e-husn hai

rakhti hain hukm jahangiri tumhari chauriyan

jan par jati hai dast-e-naz se har chiz mein

rang ban kar charhti hain hathon mein sari chauriyan

go guhar ho ai pari naz-e-nigah-e-hur ka

ainak-e-rizwan ki halqa hain tumhari chauriyan

kar ke hatha pai doli mein kiya un ko sawar

saf thandi ho gain waqt-e-sawari chauriyan

bundon ke halqe nahin parte hain ai gul nahr mein

dalta hai hindu abr-e-bahari chauriyan

khun lakhon ka kiya karte hain har jhankar se

khub sachcha jor chalti hain tumhari chauriyan

ghair dewrhi par kya karte hain araish ka zikr

halqa-e-beron-e-dar thahri tumhari chauriyan

naz se farmate hain lun kis tarah tera salam

hath uth sakte nahin aisi hain bhari chauriyan

utri parti hain phisal kar dast-e-nazuk se mudam

kis tarah thahren kalai mein tumhari chauriyan

mar dala atish-e-gham ne jala kar ai munir

thandi kar den sog mein us gul ne sari chauriyan