ہاتھ سے کچھ نہ ترے اے مہ کنعاں ہوگا

ہاتھ سے کچھ نہ ترے اے مہ کنعاں ہوگا

ہاتھ جو ہوگا تو مری موت کا ساماں ہوگا

ساقیا ہجر میں مے خانہ بیاباں ہوگا

دور ساغر بھی رم چشم غزالاں ہوگا

اے جنوں پھر مجھے خوش آنے لگی عریانی

اب نہ دامن ہی رہے گا نہ گریباں ہوگا

پھر چلیں گے ترا قد دیکھ کے گلزاروں میں

پھر ہر اک سرو و سمن سرو چراغاں ہوگا

گھر میں دل پھر مرا گھبرانے لگا آپ سے آپ

اے جنوں پھر یہ مکاں خانۂ زنداں ہوگا

پھر خوش آتی ہے مرے دل کو شب ماہ کی سیر

عشق پھر چاند سے مکھڑے کا دو چنداں ہوگا

ان دنوں پھر تجھے گویاؔ جو ہے چپکی سی لگی

پھر ارادہ طرف ملک خموشاں ہوگا

hath se kuchh na tire ai mah-e-kanan hoga

hath jo hoga to miri maut ka saman hoga

saqiya hijr mein mai khana bayaban hoga

daur-e-saghar bhi ram-e-chashm-e-ghazalan hoga

ai junun phir mujhe khush ane lagi uryani

ab na daman hi rahega na gareban hoga

phir chalenge tira qad dekh ke gulzaron mein

phir har ik sarw-o-saman sarw-e-charaghan hoga

ghar mein dil phir mira ghabrane laga ap se ap

ai junun phir ye makan khana-e-zindan hoga

phir khush ati hai mire dil ko shab-e-mah ki sair

ishq phir chand se mukhre ka do chandan hoga

in dinon phir tujhe goya jo hai chipki si lagi

phir irada taraf-e-mulk-e-khamoshan hoga