ہر آن جلوہ نئی آن سے ہے آنے کا

ہر آن جلوہ نئی آن سے ہے آنے کا

چلن یہ چلتے ہو عاشق کی جان جانے کا

قسم قدم کی ترے جب تلک ہے دم میں دم

میں پاؤں پر سے ترے سر نہیں اٹھانے کا

ہماری جان پہ گرتی ہے برق غم ظالم

تجھے تو سہل سا ہے شغل مسکرانے کا

قسم خدا کی میں کچھ کھا کے سو رہوں گا صنم

جو ساتھ اپنے نہیں مجھ کو تو سلانے کا

نصیب اس کے شراب بہشت ہووے مدام

ہوا ہے جو کوئی موجد شراب خانے کا

بہت سے خون خرابے مچیں گے خانہ خراب

یہی ہے رنگ اگر تیرے پان کھانے کا

ہماری چھاتی پہ پھرتا ہے سانپ یاں احساںؔ

وہاں ہے شغل اسے زلف کے بنانے کا

har an jalwa nai an se hai ane ka

chalan ye chalte ho ashiq ki jan jane ka

qasam qadam ki tire jab talak hai dam mein dam

main paon par se tire sar nahin uthane ka

hamari jan pe girti hai barq gham zalim

tujhe to sahl sa hai shaghl muskurane ka

qasam khuda ki main kuchh kha ke so rahunga sanam

jo sath apne nahin mujh ko to sulane ka

nasib us ke sharab-e-bahisht howe mudam

hua hai jo koi mujid sharab khane ka

bahut se khun kharabe machenge khana kharab

yahi hai rang agar tere pan khane ka

hamari chhati pe phirta hai sanp yan ehsan

wahan hai shaghl use zulf ke banane ka