ہجر کی شب نالۂ دل وہ صدا دینے لگے

ہجر کی شب نالۂ دل وہ صدا دینے لگے

سننے والے رات کٹنے کی دعا دینے لگے

آئیے حال دل مجروح سنیے دیکھیے

کیا کہا زخموں نے کیوں ٹانکے صدا دینے لگے

کس نظر سے آپ نے دیکھا دل مجروح کو

زخم جو کچھ بھر چلے تھے پھر ہوا دینے لگے

سننے والے رو دئیے سن کر مریض غم کا حال

دیکھنے والے ترس کھا کر دعا دینے لگے

جز زمین کوئے جاناں کچھ نہیں پیش نگاہ

جس کا دروازہ نظر آیا صدا دینے لگے

باغباں نے آگ دی جب آشیانے کو مرے

جن پہ تکیہ تھا وہی پتے ہوا دینے لگے

مٹھیوں میں خاک لے کر دوست آئے وقت دفن

زندگی بھر کی محبت کا صلا دینے لگے

آئنہ ہو جائے میرا عشق ان کے حسن کا

کیا مزہ ہو درد اگر خود ہی دوا دینے لگے

سینۂ سوزاں میں ثاقبؔ گھٹ رہا ہے وہ دھواں

اف کروں تو آگ دنیا کی ہوا دینے لگے

hijr ki shab nala-e-dil wo sada dene lage

sunne wale rat katne ki dua dene lage

aiye hal-e-dil-e-majruh suniye dekhiye

kya kaha zakhmon ne kyun tanke sada dene lage

kis nazar se ap ne dekha dil-e-majruh ko

zakhm jo kuchh bhar chale the phir hua dene lage

sunne wale ro diye sun kar mariz-e-gham ka hal

dekhne wale taras kha kar dua dene lage

juz zamin-e-ku-e-janan kuchh nahin pesh-e-nigah

jis ka darwaza nazar aya sada dene lage

baghban ne ag di jab ashiyane ko mire

jin pe takiya tha wahi patte hua dene lage

mutthiyon mein khak le kar dost ae waqt-e-dafn

zindagi bhar ki mohabbat ka sala dene lage

aina ho jae mera ishq un ke husn ka

kya maza ho dard agar khud hi dawa dene lage

sina-e-sozan mein saqib ghut raha hai wo dhuan

uf karun to ag duniya ki hawa dene lage