گندی لڑکی

گندی لڑکی پری ہو یا وہ حور

کرتے ہیں سب لوگ اس کو دور دور

منہ لگا کر بات تو کرتے نہیں

گندی کو پیار کرتے ہیں کہیں

مانجھ کر منجن سے دانت اپنے نہ دھوئے

ضد کرے ہر بات پر ہر لحظہ روئے

رینٹ اپنی آستین سے پوچ لے

بال سر کے آپ اپنے نوچ لے

آج پہنے کل کرے میلا لباس

اس کو آنے دے کوئی کیوں اپنے پاس

ایسی لڑکی کی بھلا کیا آبرو

چیپڑ آنکھوں میں ہو جس کے منہ میں بو

کنگھی بالوں میں نہ سر میں تیل ہے

بد تمیزی رات دن کا کھیل ہے

دھوپ میں کھیلے نہ آئے چھاؤں میں

سر پہ ٹوپی ہے نہ جوتا پاؤں میں

اچھی خاصی اپنے پڑھنے کی کتاب

جا بجا کر دے لکیروں سے خراب

روشنائی کے ہیں دھبے جا بجا

کرتے کا ہے آگا پیچھا ایک سا

کھانا کھا کر پوچ لے دامن سے ہاتھ

کپڑے بھر جائیں کبھی سالن سے ہاتھ

ایسی لڑکی کو کرے گا کون پیار

پاس جس کے جائے اس کو آئے عار

gandi larki pari ho ya wo hur

karte hain sab log us ko dur dur

munh laga kar bat to karte nahin

gandi ko pyar karte hain kahin

manjh kar manjan se dant apne na dhoe

zid kare har bat par har lahza roe

rinat apni astin se poch le

bal sar ke ap apne noch le

aj pahne kal kare maila libas

us ko ane de koi kyun apne pas

aisi larki ki bhala kya abru

chepar ankhon mein ho jis ke munh mein bu

kanghi balon mein na sar mein tel hai

bad tamizi rat din ka khel hai

dhup mein khele na ae chhaon mein

sar pe topi hai na jota paon mein

achchhi khasi apne parhne ki kitab

ja baja kar de lakiron se kharab

raushnai ke hain dhabbe ja baja

karte ka hai aga pichha ek sa

khana kha kar poch le daman se hath

kapre bhar jaen kabhi salan se hath

aisi larki ko karega kaun pyar

pas jis ke jae us ko ae ar