گونجتا ہے نالۂ مہتاب آدھی رات کو

گونجتا ہے نالۂ مہتاب آدھی رات کو

ٹوٹ جاتے ہیں سہانے خواب آدھی رات کو

بھاگتے سایوں کی چیخیں ٹوٹتے تاروں کا شور

میں ہوں اور اک محشر بے خواب آدھی رات کو

شام ہی سے بزم انجم نشۂ غفلت میں تھی

چاند نے بھی پی لیا زہراب آدھی رات کو

اک شکستہ خواب کی کڑیاں ملانے آئے ہیں

دیر سے بچھڑے ہوئے احباب آدھی رات کو

دولت احساس غم کی اتنی ارزانی ہوئی

نیند سی شے ہو گئی نایاب آدھی رات کو

gunjta hai nala-e-mahtab adhi rat ko

tut jate hain suhane khwab adhi rat ko

bhagte sayon ki chikhen tutte taron ka shor

main hun aur ik mahshar-e-be khwab adhi rat ko

sham hi se bazm-e-anjum nasha-e-ghaflat mein thi

chand ne bhi pi liya zahrab adhi rat ko

ik shikasta khwab ki kariyan milane ae hain

der se bichhre hue ahbab adhi rat ko

daulat-e-ehsas-e-gham ki itni arzani hui

nind si shai ho gai nayab adhi rat ko