الجھا دل ستم زدہ زلف بتاں سے آج

الجھا دل ستم زدہ زلف بتاں سے آج

نازل ہوئی بلا مرے سر پر کہاں سے آج

تڑپوں گا ہجر یار میں ہے رات چودھویں

تن چاندنی میں ہوگا مقابل کتاں سے آج

دو چار رشک ماہ بھی ہم راہ چاہئیں

وعدہ ہے چاندنی میں کسی مہرباں سے آج

ہنگام وصل رد و بدل مجھ سے ہے عبث

نکلے گا کچھ نہ کام نہیں اور ہاں سے آج

قعر بدن میں روح پکاری یہ وقت نزع

مدت کے بعد اٹھتے ہیں ہم اس مکاں سے آج

کھینچی ہے چرخ نے بھی کسی مانگ کی شبیہ

ثابت ہوئی یہ بات مجھے کہکشاں سے آج

اندھیر تھا نگاہ امانتؔ میں شام سحر

تم چاند کی طرح نکل آئے کہاں سے آج

uljha dil-e-sitam zada zulf-e-butan se aj

nazil hui bala mire sar par kahan se aj

tarpunga hijr-e-yar mein hai rat chaudhwin

tan chandni mein hoga muqabil katan se aj

do char rashk-e-mah bhi ham rah chahiyen

waada hai chandni mein kisi mehrban se aj

hangam-e-wasl rad-o-badal mujh se hai abas

niklega kuchh na kam nahin aur han se aj

qaaar badan mein ruh pukari ye waqt-e-nazaa

muddat ke baad uthte hain ham is makan se aj

khinchi hai charkh ne bhi kisi mang ki shabih

sabit hui ye bat mujhe kahkashan se aj

andher tha nigah amanat mein sham-e-sahar

tum chand ki tarah nikal ae kahan se aj