گوش کر فریاد عاشق جان کر

گوش کر فریاد عاشق جان کر

نالۂ بلبل پہ اے گل کان کر

جب بدل کپڑے کفن کا دھیان کر

غسل میت جان جب اشنان کر

کھال مجھ محو مژہ کی جان کر

رکھ دیا چھلنی کا سینہ چھان کر

مٹ گئے اس کی چقوں کو دیکھ کر

بلبلے ابھرے جو سینہ تان کر

سخت جاں وہ ہوں جو ہو مجھ پر رواں

اسلحے رہ جائیں لوہا مان کر

آگ میں اپنے مثال شمع جل

پر زبان سے اف نہ اے نادان کر

نشتر مژگاں ہو بوندی کی کٹار

بوند بھر پانی پلا احسان کر

اے در یکتا جناب خضر نے

اک مجھے پایا زمانہ چھان کر

جسم زار قیس کا پوچھا جو حال

رکھ دیا مکڑی نے جالا تان کر

غم گناہوں کا نہ کھا شادؔ حزیں

رحمۃ للعالمیں پر دھیان کر

gosh kar fariyad ashiq jan kar

nala-e-bulbul pe ai gul kan kar

jab badal kapre kafan ka dhyan kar

ghusl-e-mayyat jan jab ashnan kar

khal mujh mahw-e-mizha ki jan kar

rakh diya chhalni ka sina chhan kar

mit gae us ki chaqon ko dekh kar

bulbule ubhre jo sina tan kar

sakht jan wo hun jo ho mujh par rawan

aslihe rah jaen loha man kar

ag main apne misal-e-shama jal

par zaban se uf na ai nadan kar

nashtar-e-mizhgan ho bundi ki katar

bund bhar pani pila ehsan kar

ai dar-e-yakta janab-e-khizr ne

ik mujhe paya zamana chhan kar

jism-e-zar-e-qais ka puchha jo hal

rakh diya makri ne jala tan kar

gham gunahon ka na kha shad-e-hazin

rahmat lalalmen par dhyan kar