گو کہ محتاج ہیں گدا ہیں ہم

گو کہ محتاج ہیں گدا ہیں ہم

بے نیازی کے بادشا ہیں ہم

چشم تحقیر سے ہمیں مت دیکھ

خاک تو ہیں پہ توتیا ہیں ہم

آہ اس عمر بے بقا کی طرح

رہرو کشور فنا ہیں ہم

ایسا بے برگ و بے نواہی کون

جیسے بے برگ و بے نوا ہیں ہم

گو ہمیں تو کبھی نہ یاد کرے

پر تری یاد میں سدا ہیں ہم

مبتلا اس بلا میں کوئی نہ ہو

جس بلا میں کہ مبتلا ہیں ہم

مار کر بھی ہمیں پہ پچھتایا

بے وفا تو کہ بے وفا ہیں ہم

جبہہ سائی سے دشمنی ہے جسے

اسی کے در پہ جبہہ سا ہیں ہم

کون رہبر ہو عشق کی رہ میں

آپ ہی اپنے رہنما ہیں ہم

ہیں تو صورت پرست آئینہ دار

نیک معنی سے آشنا ہیں ہم

اور دیوانہ کون ہے ؔجوشش

یا دوانا تھا قیس یا ہیں ہم

go ke mohtaj hain gada hain ham

be niyazi ke badsha hain ham

chashm-e-tahqir se hamen mat dekh

khak to hain pe tutiya hain ham

ah is umr be baqa ki tarah

rahrau kishwar fana hain ham

aisa be barg-o-be nawahi kaun

jaise be barg-o-be nawa hain ham

go hamen to kabhi na yad kare

par tiri yad mein sada hain ham

mubtala is bala mein koi na ho

jis bala mein ke mubtala hain ham

mar kar bhi hamen pe pachhtaya

be wafa to ke be wafa hain ham

jabha sai se dushmani hai jise

usi ke dar pe jabha sa hain ham

kaun rahbar ho ishq ki rah mein

ap hi apne rahnuma hain ham

hain to surat parast aina dar

nek maani se ashna hain ham

aur diwana kaun hai joshish

ya dawana tha qais ya hain ham