گور میں یادِ قدِ یار نے سونے نہ دیا

گور میں یادِ قدِ یار نے سونے نہ دیا

فتنۂ حشر کو رفتار نے سونے نہ دیا

واہ اے طالعِ خفتہ کہ شبِ عیش میں بھی

وہم بے خوابیِ اغیار نے سونے نہ دیا

وا رہیں صورتِ آغوش، سحر تک آنکھیں

شوقِ ہم خوبیِ دلدار نے سونے نہ دیا

یاس سے آنکھ بھی جھپکی تو توقع سے کھلی

صبح تک وعدۂ دیدار نے سونے نہ دیا

طالعِ خفتہ کی تعریف کہاں تک کیجے

پاؤں کو بھی خلشِ خار نے سونے نہ دیا

دردِ دل سے جو کہا نیند نہ آئی؟ تو کہا

مجھ کو کب نرگسِ بیمار نے سونے نہ دیا

شبِ ہجراں نے کہا قصۂ گیسوئے دراز

شیفتہ تو بھی دلِ زار نے سونے نہ دیا

gor mein yad-e-qad-e-yar ne sone na diya

fitna-e-hashr ko raftar ne sone na diya

wah ai tale-e-khufta ke shab-e-aish mein bhi

wahm be khwabi-e-aghyar ne sone na diya

wa rahen surat-e-aghosh, sahar tak ankhen

shauq-e-ham khubi-e-dildar ne sone na diya

yas se ankh bhi jhapki to tawaqqo se khuli

subh tak waada-e-didar ne sone na diya

tale-e-khufta ki taarif kahan tak kije

paon ko bhi khalish-e-khar ne sone na diya

dard-e-dil se jo kaha nind na ai? to kaha

mujh ko kab nargis-e-bimar ne sone na diya

shab-e-hijran ne kaha qissa-e-gesu-e-daraz

shefta tu bhi dil-e-zar ne sone na diya