گلے میں ہاتھ تھے شب اس پری سے راہیں تھیں

گلے میں ہاتھ تھے شب اس پری سے راہیں تھیں

سحر ہوئی تو وہ آنکھیں نہ وہ نگاہیں تھیں

نکل کے چہرے پہ میدان صاف خط نے کیا

کبھی یہ شہر تھا ایسا کہ بند راہیں تھیں

فراق میں ترے عاشق کو جا کے کل دیکھا

کہ وہ تو ہیچ تھا کچھ اشک تھے کچھ آہیں تھیں

بگولے اب ہیں کہ غربت ہے گور شاہاں پر

سروں پہ چتر جلو میں کبھی سپاہیں تھیں

ہزاروں لوٹ گئے کل اٹھی جو وہ چلمن

خدنگ موئے مژہ برچھیاں نگاہیں تھیں

کیا یہ شوق نے اندھا مجھے نہ سوجھا کچھ

وگرنہ ربط کی اس سے ہزار راہیں تھیں

یہ ضعف ہے کہ نکلتی نہیں ہیں اب دل سے

کبھی فلک سے بھی اونچی ہماری آہیں تھیں

جگر میں ہجر کی کل چبھ رہی تھیں کچھ پھانسیں

مگر جو غور سے دیکھا تری نگاہیں تھیں

پہنچ گئے سر منزل چلے جو چال نئی

انہیں میں پھیر تھا دیکھی ہوئی جو راہیں تھیں

فلک کے دور سے دنیا بدل گئی ورنہ

جہاں بنے ہیں یہ مے خانے خانقاہیں تھیں

یہ ضعف اب ہے کہ ہلنا گراں ہے قدموں کو

سبک روی میں کبھی ان کو دستگاہیں تھیں

مشاعرے سے حسیں کیوں نہ چھین لے جاتے

رباعیاں مری چو گو شبہ کلاہیں تھیں

حسین زر کے ہیں طالب کہ اب ہیں گرد امیرؔ

غریب ہم تھے تو یہ پیار تھا نہ چاہیں تھیں

gale mein hath the shab us pari se rahen thin

sahar hui to wo ankhen na wo nigahen thin

nikal ke chehre pe maidan saf khat ne kiya

kabhi ye shahr tha aisa ke band rahen thin

firaq mein tire ashiq ko ja ke kal dekha

ke wo to hech tha kuchh ashk the kuchh ahen thin

bagule ab hain ke ghurbat hai gor shahan par

saron pe chitr jilau mein kabhi sipahen thin

hazaron laut gae kal uthi jo wo chilman

khadang mu-e-mizha barchhiyan nigahen thin

kiya ye shauq ne andha mujhe na sujha kuchh

wagarna rabt ki us se hazar rahen thin

ye zof hai ke nikalti nahin hain ab dil se

kabhi falak se bhi unchi hamari ahen thin

jigar mein hijr ki kal chubh rahi thin kuchh phansen

magar jo ghaur se dekha tiri nigahen thin

pahunch gae sar-e-manzil chale jo chal nai

unhen mein pher tha dekhi hui jo rahen thin

falak ke daur se duniya badal gai warna

jahan bane hain ye mai khane khanqahen thin

ye zof ab hai ke hilna giran hai qadmon ko

subuk rawi mein kabhi un ko dastgahen thin

mushaare se hasin kyun na chhin le jate

rubaiyan miri chau go shuba kulahen thin

hasin zar ke hain talib ke ab hain gard amir

gharib ham the to ye pyar tha na chahen thin