گزارے ہجر میں برسوں ہی وصل یار کے بعد

گزارے ہجر میں برسوں ہی وصل یار کے بعد

اٹھایا جبر بہت ہم نے اختیار کے بعد

نہ دشمنوں کے لئے تھی زمین کوچۂ دوست

بنی نہ پھر کوئی تربت مرے مزار کے بعد

کس آسرے پہ گزاروں زمانۂ فرقت

کہ ناامید ہوا ہوں اک انتظار کے بعد

خزاں کے بعد الٰہی بہار پھر دیکھیں

خزاں تو دیکھ چکے موسم بہار کے بعد

مرے شباب کی یاد آ رہی ہے پیری میں

کہ قدر نشہ کی ہوتی ہے کچھ خمار کے بعد

ملا جو قیس سا ہم رنگ دشت وحشت میں

ہوا سکون طبیعت کو انتشار کے بعد

وہ مشق تیر تھی ان کی ہمارے ہی دل تک

ملا نہ پھر کوئی نخچیر اس شکار کے بعد

پس فنا ہے تباہی کی ابتدا مجھ سے

بہت سی آندھیاں اٹھیں گی اس غبار کے بعد

ہم ان کے بس میں ہیں قابو میں تھے جو اپنی دلیرؔ

یہ بے بسی نہ کسی کو ہو اختیار کے بعد

guzare hijr mein barson hi wasl-e-yar ke baad

uthaya jabr bahut ham ne ikhtiyar ke baad

na dushmanon ke liye thi zamin-e-kucha-e-dost

bani na phir koi turbat mire mazar ke baad

kis asre pe guzarun zamana-e-furqat

ke naummid hua hun ik intizar ke baad

khizan ke baad ilahi bahar phir dekhen

khizan to dekh chuke mausam-e-bahar ke baad

mire shabab ki yad a rahi hai piri mein

ke qadar nasha ki hoti hai kuchh khumar ke baad

mila jo qais sa ham rang dasht-e-wahshat mein

hawa sukun-e-tabiat ko intishar ke baad

wo mashq tir thi un ki hamare hi dil tak

mila na phir koi nakhchir is shikar ke baad

pas fana hai tabahi ki ibtida mujh se

bahut si andhiyan uthengi is ghubar ke baad

ham un ke bas mein hain qabu mein the jo apni diler

ye be basi na kisi ko ho ikhtiyar ke baad