گزرے وعدے کو وہ خود یاد دلا دیتے ہیں

گزرے وعدے کو وہ خود یاد دلا دیتے ہیں

دل کی سوئی ہوئی حسرت کو جگا دیتے ہیں

نو گرفتار قفس ہیں نہیں کرتے فریاد

جان کو تیری یہ صیاد دعا دیتے ہیں

طالب جلوۂ دیدار سمجھ کر مجھ کو

اک جھلک سی رخ روشن کی دکھا دیتے ہیں

ذبح کرتے ہیں تڑپنے نہیں دیتے مجھ کو

تہہ زانو مری گردن کو دبا دیتے ہیں

اپنے موقع پہ ہر اک بات بھلی ہوتی ہے

شب فرقت میں یہ صدمے بھی مزا دیتے ہیں

غیر کے کہنے سے در گور کہا کرتے ہیں

جیتے جی وہ مجھے پیغام قضا دیتے ہیں

میں وہ قیدی ہوں کہ سونے نہیں دیتے مجھ کو

آنکھ لگتی ہے تو زنجیر ہلا دیتے ہیں

لے لیا بوسۂ رخسار تو کیا جرم کیا

پیار کی بات پہ ناحق وہ سزا دیتے ہیں

شمع محفل ہوں نہ عاشق نہ میں بوئے گل ہوں

مہ جبیں کیوں مجھے آنچل کی ہوا دیتے ہیں

ان کے قبضہ میں ہے کونین کی شاہی عاشقؔ

شاہ وہ دے نہیں سکتے جو گدا دیتے ہیں

guzre waade ko wo khud yad dila dete hain

dil ki soi hui hasrat ko jaga dete hain

nau giraftar-e-qafas hain nahin karte fariyad

jan ko teri ye sayyad dua dete hain

talib-e-jalwa-e-didar samajh kar mujh ko

ik jhalak si rukh-e-raushan ki dikha dete hain

zabh karte hain tarapne nahin dete mujh ko

tah-e-zanu miri gardan ko daba dete hain

apne mauqaa pe har ik bat bhali hoti hai

shab-e-furqat mein ye sadme bhi maza dete hain

ghair ke kahne se dar gor kaha karte hain

jite ji wo mujhe paigham-e-qaza dete hain

main wo qaidi hun ke sone nahin dete mujh ko

ankh lagti hai to zanjir hila dete hain

le liya bosa-e-rukhsar to kya jurm kiya

pyar ki bat pe nahaq wo saza dete hain

sham-e-mahfil hun na ashiq na main bu-e-gul hun

mah jabin kyun mujhe anchal ki hawa dete hain

un ke qabza mein hai kaunain ki shahi ashiq

shah wo de nahin sakte jo gada dete hain