گزرا بنائے چرخ سے نالہ پگاہ کا

گزرا بنائے چرخ سے نالہ پگاہ کا

خانہ خراب ہو جیو اس دل کی چاہ کا

آنکھوں میں جی مرا ہے ادھر دیکھتا نہیں

مرتا ہوں میں تو ہائے رے صرفہ نگاہ کا

صد خانماں خراب ہیں ہر ہر قدم پہ دفن

کشتہ ہوں یار میں تو ترے گھر کی راہ کا

یک قطرہ خون ہو کے پلک سے ٹپک پڑا

قصہ یہ کچھ ہوا دل غفراں پناہ کا

تلوار مارنا تو تمہیں کھیل ہے ولے

جاتا رہے نہ جان کسو بے گناہ کا

بدنام و خوار و زار و نزار و شکستہ حال

احوال کچھ نہ پوچھیے اس رو سیاہ کا

ظالم زمیں سے لوٹتا دامن اٹھا کے چل

ہوگا کمیں میں ہاتھ کسو داد خواہ کا

اے تاج شہ نہ سر کو فرو لاؤں تیرے پاس

ہے معتقد فقیر نمد کی کلاہ کا

ہر لخت دل میں صید کے پیکان بھی گئے

دیکھا میں شوخ ٹھاٹھ تری صید گاہ کا

بیمار تو نہ ہووے جیے جب تلک کہ میرؔ

سونے نہ دے گا شور تری آہ آہ کا

guzra banae charkh se nala pagah ka

khana kharab ho jiyo is dil ki chah ka

ankhon mein ji mira hai idhar dekhta nahin

marta hun main to hae re sarfa nigah ka

sad khanuman kharab hain har har qadam pe dafn

kushta hun yar mein to tire ghar ki rah ka

yak qatra khun ho ke palak se tapak para

qissa ye kuchh hua dil-e-ghufran panah ka

talwar marna to tumhen khel hai wale

jata rahe na jan kisu be gunah ka

badnam-o-khwar-o-zar-o-nizar-o-shikasta hal

ahwal kuchh na puchhiye is ro siyah ka

zalim zamin se lautta daman utha ke chal

hoga kamin mein hath kisu dad khwah ka

ai taj-e-shah na sar ko faro laun tere pas

hai motaqid faqir namad ki kulah ka

har lakht-e-dil mein said ke paikan bhi gae

dekha main shokh thath tiri said gah ka

bimar to na howe jiye jab talak ke mir

sone na dega shor tiri ah ah ka