گریز

یہ جا کر کوئی بزم خوباں میں کہہ دو

کہ اب درخور بزم خوباں نہیں میں

مبارک تمہیں قصر و ایواں تمہارے

وہ دلدادۂ قصر و ایواں نہیں میں

جوانی بھی سرکش محبت بھی سرکش

وہ زندانی زلف پیچاں نہیں میں

تڑپ میری فطرت تڑپتا ہوں لیکن

وہ زخمیٔ پیکان مژگاں نہیں میں

دھڑکتا ہے دل اب بھی راتوں کو لیکن

وہ نوحہ گر درد ہجراں نہیں میں

بہ ایں تشنہ کامی بہ ایں تلخ کامی

رہین لب شکر افشاں نہیں میں

شراب و شبستاں کا مارا ہوں لیکن

وہ غرق شراب شبستاں نہیں میں

قسم نطق کی شعلہ افشانیوں کی

کہ شاعر تو ہوں اب غزل خواں نہیں میں

ye ja kar koi bazm-e-khuban mein kah do

ke ab darkhur-e-bazm-e-khuban nahin main

mubarak tumhen qasr-o-aiwan tumhare

wo dildada-e-qasr-o-aiwan nahin main

jawani bhi sarkash mohabbat bhi sarkash

wo zindani-e-zulf-e-pechan nahin main

tarap meri fitrat tarapta hun lekin

wo zakhmi-e-paikan-e-mizhgan nahin main

dharakta hai dil ab bhi raton ko lekin

wo nauha gar-e-dard-e-hijran nahin main

ba ain tishna kami ba ain talkh kami

rahin-e-lab-e-shukr afshan nahin main

sharab-o-shabistan ka mara hun lekin

wo gharq-e-sharab-e-shabistan nahin main

qasam nutq ki shola afshaniyon ki

ke shayar to hun ab ghazal khwan nahin main