گریباں چاک ہیں گل بوستاں میں
میر مہدی مجروحگریباں چاک ہیں گل بوستاں میں
اثر کتنا ہے بلبل کی فغاں میں
قفس صیاد کا خالی پڑا ہے
نہ ہوں بے چین کیوں کر آشیاں میں
دعائے وصل جا اب تو اثر تک
کئے نالوں نے روزن آسماں میں
سنے گر طالع خفتہ کا قصہ
تو نیند آ جائے چشم پاسباں میں
زلیخا کی مچی جاتی ہیں آنکھیں
کہیں یوسف نہ ہو اس کارواں میں
تمام اسباب دنیاوی کے بدلے
ہے اک بے رونقی اپنی دکاں میں
سنا حال دل مجروحؔ شب کو
کوئی حسرت سی حسرت تھی بیاں میں
gareban chak hain gul bostan mein
asar kitna hai bulbul ki fughan mein
qafas sayyad ka khali para hai
na hun be chain kyun kar ashiyan mein
dua-e-wasl ja ab to asar tak
kiye nalon ne rauzan asman mein
sune gar tale-e-khufta ka qissa
tu nind a jae chashm-e-pasban mein
zulekha ki machi jati hain ankhen
kahin yusuf na ho is karwan mein
tamam asbab dunyawi ke badle
hai ik be raunaqi apni dukan mein
suna hal-e-dil-e-majruh shab ko
koi hasrat si hasrat thi bayan mein