گزر کو ہے بہت اوقات تھوڑی

گزر کو ہے بہت اوقات تھوڑی

کہ ہے یہ طول قصہ رات تھوڑی

جو مے زاہد نے مانگی مست بولے

بہت یا قبلۂ حاجات تھوڑی

کہاں غنچہ کہاں اس کا دہن تنگ

بڑھائی شاعروں نے بات تھوڑی

اٹھے کیا زانوے غم سے سر اپنا

بہت گزری رہی ہیہات تھوڑی

خیال ضبط گریہ ہے جو ہم کو

بہت امسال ہے برسات تھوڑی

پلائے لے کے نقد ہوش ساقی

تہی دستوں کی ہے اوقات تھوڑی

وہی ہے آسماں پر گنج انجم

ملی تھی جو تری خیرات تھوڑی

ترا اے دخت رز واصف ہے واعظ

پئے حرمت ہے اتنی بات تھوڑی

چلو منزل امیرؔ آنکھیں تو کھولو

نہایت رہ گئی ہے رات تھوڑی

guzar ko hai bahut auqat thori

ke hai ye tul-e-qissa rat thori

jo mai zahid ne mangi mast bole

bahut ya qibla-e-hajat thori

kahan ghuncha kahan us ka dahan tang

barhai shayaron ne bat thori

uthe kya zanue gham se sar apna

bahut guzri rahi hehat thori

khayal-e-zabt-e-girya hai jo ham ko

bahut imsal hai barsat thori

pilae le ke naqd-e-hosh saqi

tahi daston ki hai auqat thori

wahi hai asman par ganj anjum

mili thi jo tiri khairat thori

tira ai dukht-e-raz wasaf hai waiz

piye hurmat hai itni bat thori

chalo manzil amir ankhen to kholo

nihayat rah gai hai rat thori