گر انہیں ہے اپنی صورت پر گھمنڈ

گر انہیں ہے اپنی صورت پر گھمنڈ

ہم کو ہے اپنی محبت پر گھمنڈ

میرے ان کے پھر بھلا کیوں کر بنے

ختم ہے دونوں کی خصلت پر گھمنڈ

کیا نہیں دیکھی بلندی آہ کی

کیوں فلک کرتا ہے رفعت پر گھمنڈ

کام قاروں کے نہ آیا مال و زر

منعمو بے جا ہے دولت پر گھمنڈ

بادشاہ ہفت کشور ہے تو کیا

کر نہ دو دن کی حکومت پر گھمنڈ

دیکھ کر آئینہ مجھ کو دنگ ہے

مجھ کو بھی ہے اپنی حیرت پر گھمنڈ

ان کو اپنی صبح محشر پر ہے ناز

ہم کو اپنی شام فرقت پر گھمنڈ

چھپ چھپا کر دیکھ بھی لیں گے تمہیں

ہم کو بھی ہے اپنی جرأت پر گھمنڈ

کچھ نہیں کر سکتا انجمؔ آپ کا

آسماں کو ہے جو حسرت پر گھمنڈ

gar unhen hai apni surat par ghamand

ham ko hai apni mohabbat par ghamand

mere un ke phir bhala kyun kar bane

khatm hai donon ki khaslat par ghamand

kya nahin dekhi bulandi ah ki

kyun falak karta hai rifat par ghamand

kam qarun ke na aya mal-o-zar

munamo be ja hai daulat par ghamand

badshah-e-haft kishwar hai to kya

kar na do din ki hukumat par ghamand

dekh kar aina mujh ko dang hai

mujh ko bhi hai apni hairat par ghamand

un ko apni subh-e-mahshar par hai naz

ham ko apni sham-e-furqat par ghamand

chhup chhupa kar dekh bhi lenge tumhen

ham ko bhi hai apni jurat par ghamand

kuchh nahin kar sakta anjum ap ka

asman ko hai jo hasrat par ghamand