گر تعلی پر ہے وہم امتحان مے فروش

گر تعلی پر ہے وہم امتحان مے فروش

بے نشاں ہو کر نکالیں گے نشان مے فروش

سجدے کرتے ہیں خم مے کو وفور نشہ میں

صورت مینائے مے مداح شان مے فروش

جام و مینا و صراحی و سبو سے بے گماں

ساقیٔ مشفق پہ ہوتا ہے گمان مے فروش

بھٹیوں پر جا کے پوچھیں گے بہار آنے تو دو

عالم مستی میں مستوں سے بیان مے فروش

شیشہ و جام و صراحی و سبو کیا مال ہیں

بخش دیں گے جوش مستی میں دوکان مے فروش

میکدے میں دخت رز کو لا بٹھائیں گے ضرور

پہلوئے مینائے دل میں میہمان مے فروش

جام آنکھیں ہیں تو بادہ اشک ہے شیشہ ہے دل

دیکھ او مے نوش میں بھی ہوں لبان مے فروش

کس قدر چمکا ہوا ہے بادۂ گلگوں کا دور

ایک عالم آج کل ہے مہمان مے فروش

میں بھی ہوں اک ساقی مے نوش تیرے دور میں

کفش بردار شریک خادمان مے فروش

خم کے خم کر دوں تہی دم بھر میں وہ مے نوش ہوں

اے شگفتہؔ ہاتھ آئے گر دکان مے فروش

gar taalli par hai wahm-e-imtihan-e-mai farosh

be nishan ho kar nikalenge nishan-e-mai farosh

sajde karte hain kham-e-mai ko wafur-e-nasha mein

surat-e-mina-e-mai maddah shan-e-mai farosh

jam-o-mina-o-surahi-o-subu se be guman

saqi-e-mushfiq pe hota hai guman-e-mai farosh

bhattiyon par ja ke puchhenge bahar ane to do

alam-e-masti mein maston se bayan-e-mai farosh

shisha-o-jam-o-surahi-o-subu kya mal hain

bakhsh denge josh-e-masti mein dukan-e-mai farosh

maikade mein dukht-e-raz ko la bithaenge zarur

pahlu-e-mina-e-dil mein mehman mai farosh

jam ankhen hain to bada ashk hai shisha hai dil

dekh o mai nosh mein bhi hun luban-e-mai farosh

kis qadar chamka hua hai bada-e-gulgun ka daur

ek alam aj kal hai mehman-e-mai farosh

main bhi hun ik saqi-e-mai nosh tere daur mein

kafsh bardar sharik-e-khadiman-e-mai farosh

kham ke kham kar dun tahi dam bhar mein wo mai nosh hun

ai shagufta hath ae gar dukan-e-mai farosh