گر میرے بیٹھنے سے وہ آزار کھینچتے

گر میرے بیٹھنے سے وہ آزار کھینچتے

تو اپنے در کی آ کے وہ دیوار کھینچتے

ناز و ادا و غمزہ سے یوں دل لیا مرا

لے جائیں جیسے مست کو ہشیار کھینچتے

وا حسرتا ہوئی انہیں آنے کی تب خبر

لائے جب اس گلی میں مجھے یار کھینچتے

آئے گا ان کے کہنے سے وہ گل یہاں تلک

کانٹوں پہ کیوں ہیں اب مجھے اغیار کھینچتے

واں شوق جالیوں کا ہے اس جامہ زیب کو

یاں اپنے پیرہن سے ہیں ہم تار کھینچتے

ہیں تیغ نگاہ یار اچٹتی لگی ہے پھر

برسوں گزر گئے مجھے آزار کھینچتے

کہتے ہیں شب وہ کہتے تھے آتا ہے جی گھٹا

نالے جو ہم رہے پس دیوار کھینچتے

آزردہ ان کو دیکھتے ہی جاں نکل گئی

وہ دیکھ مجھ کو رہ گئے تلوار کھینچتے

تسکینؔ کا چاک چاک ہوا دل جو شانے کو

دیکھا کسی کا طرۂ طرار کھینچتے

gar mere baithne se wo azar khinchte

tu apne dar ki a ke wo diwar khinchte

naz-o-ada-o-ghamza se yun dil liya mira

le jaen jaise mast ko hushyar khinchte

wa hisrata hui unhen ane ki tab khabar

lae jab us gali mein mujhe yar khinchte

aega un ke kahne se wo gul yahan talak

kanton pe kyun hain ab mujhe aghyar khinchte

wan shauq jaliyon ka hai is jama zeb ko

yan apne pairahan se hain ham tar khinchte

hain tegh-e-nigah-e-yar achtati lagi hai phir

barson guzar gae mujhe azar khinchte

kahte hain shab wo kahte the ata hai ji ghata

nale jo ham rahe pas-e-diwar khinchte

azurda un ko dekhte hi jan nikal gai

wo dekh mujh ko rah gae talwar khinchte

taskin ka chak chak hua dil jo shane ko

dekha kisi ka turra-e-tarrar khinchte