گر کوئی کاٹ لے سر بھی ترے دیوانے کا

گر کوئی کاٹ لے سر بھی ترے دیوانے کا

پر یہ سودائے محبت ہے نہیں جانے کا

مست رکھ یاد میں اس چشم کی تا روز جزا

منہ نہ دکھلا مجھے یارب کسی مے خانے کا

میرے دل کو بھی نہ ہووے ہوس بوسہ اگر

آشنا لب سے ترے لب نہ ہو پیمانے کا

حسن اور عشق کا مذکور نہ ہووے جب تک

مجھ کو بھاتا نہیں سننا کسی افسانے کا

کیوں نہ مضطر ہوں اسے دیکھ کے دیکھو تو سہی

شمع کے سامنے کیا حال ہے پروانے کا

ہاتھ اٹھتا نہیں اے یار جو سلجھانے سے

دل تری زلف سے الجھا ہے مگر شانے کا

گو کہ مر جائے ترے عشق میں ؔجوشش لیکن

شکوۂ جور و جفا منہ پہ نہیں لانے کا

gar koi kat le sar bhi tire diwane ka

par ye sauda-e-mohabbat hai nahin jane ka

mast rakh yad mein us chashm ki ta roz-e-jaza

munh na dikhla mujhe yarab kisi mai khane ka

mere dil ko bhi na howe hawas-e-bosa agar

ashna lab se tire lab na ho paimane ka

husn aur ishq ka mazkur na howe jab tak

mujh ko bhata nahin sunna kisi afsane ka

kyun na muztar hun use dekh ke dekho to sahi

shama ke samne kya hal hai parwane ka

hath uthta nahin ai yar jo sulajhane se

dil tiri zulf se uljha hai magar shane ka

go ke mar jae tire ishq mein joshish lekin

shikwa-e-jaur-o-jafa munh pe nahin lane ka