گاندھیؔ جی کی یاد میں!

وہی ہے شور ہائے و ہو، وہی ہجوم مرد و زن

مگر وہ حسن زندگی، مگر وہ جنت وطن

وہی زمیں، وہیں زماں، وہی مکیں، وہی مکاں

مگر سرور یک دلی، مگر نشاط انجمن

وہی ہے شوق نو بہ نو، وہی جمال رنگ رنگ

مگر وہ عصمت نظر، طہارت لب و دہن

ترقیوں پہ گرچہ ہیں، تمدن و معاشرت

مگر وہ حسن سادگی، وہ سادگی کا بانکپن

شراب نو کی مستیاں، کہ الحفیظ و الاماں

مگر وہ اک لطیف سا سرور بادۂ کہن

یہ نغمۂ حیات ہے کہ ہے اجل ترانہ سنج

یہ دور کائنات ہے کہ رقص میں ہے اہرمن

ہزار در ہزار ہیں اگرچہ رہبران ملک

مگر وہ پیر نوجواں، وہ ایک مرد صف شکن

وہی مہاتما وہی شہید امن و آشتی

پریم جس کی زندگی، خلوص جس کا پیرہن

وہی ستارے ہیں، مگر کہاں وہ ماہتاب ہند

وہی ہے انجمن، مگر کہاں وہ صدر انجمن

wahi hai shor hae-o-ho, wahi hujum-e-mard-o-zan

magar wo husn-e-zindagi, magar wo jannat-e-watan

wahi zamin, wahin zaman, wahi makin, wahi makan

magar surur-e-yak dili, magar nishat-e-anjuman

wahi hai shauq-e-nau ba nau, wahi jamal-e-rang rang

magar wo ismat-e-nazar, taharat-e-lab-o-dahan

taraqqiyon pe garche hain, tamaddun-o-muasharat

magar wo husn-e-sadgi, wo sadgi ka bankpan

sharab-e-nau ki mastiyan, ke alhafiz-o-alaman

magar wo ik latif sa surur-e-bada-e-kuhan

ye naghma-e-hayat hai ke hai ajal tarana sanj

ye daur-e-kainat hai ke raqs mein hai ahriman

hazar dar hazar hain agarche rahbaran-e-mulk

magar wo pir naujawan, wo ek mard-e-saf shikan

wahi mahatma wahi shahid-e-amn-o-ashti

prem jis ki zindagi, khulus jis ka pairahan

wahi sitare hain, magar kahan wo mahtab-e-hind

wahi hai anjuman, magar kahan wo sadr-e-anjuman