گر کہوں غیر سے پھر ربط ہوا تجھ کو کیا

گر کہوں غیر سے پھر ربط ہوا تجھ کو کیا

کیا برا مان کے کہتا ہے بھلا تجھ کو کیا

سر اٹھانا تجھے بالیں سے جو دشوار ہے اب

کیوں دلا بیٹھے بٹھائے یہ ہوا تجھ کو کیا

پوچھوں رنجش کا سبب اس سے تو جھنجھلا کے کہے

گر خفا ہوں تو میں ہوں آپ کو، جا تجھ کو کیا

ہم اسیران قفس کیا کہیں خاموش ہیں کیوں

راہ لے اپنی چل اے باد صبا تجھ کو کیا

گر کیا اس سے جدا مجھ کو تو کہہ دے یہ فلک

میرے اور اس کے نہ ملنے سے ملا تجھ کو کیا

ہاتھ اٹھاتا نہیں گر عشق سے میں اے ناصح

تو نصیحت سے مری ہاتھ اٹھا تجھ کو کیا

گر کہو نام خدا لگتے ہو تم کیا ہی بھلے

تو یہ کہتا ہے بھلا ہوں تو بھلا، تجھ کو کیا

کیوں دلا بستر غم پر ہے تو خاموش پڑا

کچھ تو کہہ مجھ سے کسی نے یہ کہا تجھ کو کیا

اب وہ موقوف ہوا نامہ و پیغام بھی آہ

حرف غیروں کا اثر کر ہی گیا تجھ کو کیا

میرے ملنے سے کیا منع کسی نے جو تجھے

تو نے اس بات کو سن کر نہ کہا تجھ کو کیا

پیک اشک آنکھوں سے چل نکلے جو خط پڑھتے ہی

جرأتؔ اب کچھ تو بتا اس نے لکھا تجھ کو کیا

gar kahun ghair se phir rabt hua tujh ko kiya

kya bura man ke kahta hai bhala tujh ko kiya

sar uthana tujhe balin se jo dushwar hai ab

kyun dila baithe bithae ye hua tujh ko kiya

puchhun ranjish ka sabab us se to jhanjhla ke kahe

gar khafa hun to main hun ap ko, ja tujh ko kiya

ham asiran qafas kya kahen khamosh hain kyun

rah le apni chal ai bad-e-saba tujh ko kiya

gar kiya us se juda mujh ko to kah de ye falak

mere aur us ke na milne se mila tujh ko kiya

hath uthata nahin gar ishq se main ai naseh

tu nasihat se miri hath utha tujh ko kiya

gar kaho nam-e-khuda lagte ho tum kya hi bhale

to ye kahta hai bhala hun to bhala, tujh ko kiya

kyun dila bistar-e-gham par hai to khamosh para

kuchh to kah mujh se kisi ne ye kaha tujh ko kiya

ab wo mauquf hua nama-o-paigham bhi ah

harf ghairon ka asar kar hi gaya tujh ko kiya

mere milne se kiya mana kisi ne jo tujhe

tu ne is bat ko sun kar na kaha tujh ko kiya

pik-e-ashk ankhon se chal nikle jo khat parhte hi

jurat ab kuchh to bata us ne likha tujh ko kiya