کر کے دل نالاں سے مرے ساز کسی نے — کیفی چریاکوٹی (Kaifi Chirayyakoti)

کر کے دل نالاں سے مرے ساز کسی نے

دی ہے مجھے پردے سے یہ آواز کسی نے

اس دل کا ہے جو درد وہی جان ہے دل کی

سمجھا نہ کبھی عشق کا یہ راز کسی نے

وا باب قفس اور ہوں میں باب قفس پر

جیسے کہ اڑا لی پر پرواز کسی نے

تقدیر میں جو کچھ مری ہنسنا ہے کہ رونا

بخشا وہی دل کو مرے انداز کسی نے

ہر اشک کا قطرہ تھا فسانہ مرے دل کا

دیکھا نہ مرا دیدۂ غماز کسی نے

دی مجھ کو تڑپ وہ بھی بقدر دل بے تاب

میں کیا کہ یہ سمجھا نہ ترا راز کسی نے

ہر شعر ہے ڈوبا ہوا تاثیر میں کیفیؔ

بخشا ہے مجھے خامۂ اعجاز کسی نے