کثرت وحدانیت میں حسن کی تنویر دیکھ

کثرت وحدانیت میں حسن کی تنویر دیکھ

دیدۂ حق بیں سے رنگ عالم تصویر دیکھ

اس قدر کھنچنا نہیں اچھا بت بے پیر دیکھ

پیار کی نظروں سے سوئے عاشق دلگیر دیکھ

غیر نے مجھ پر ستم ڈھائے ہیں ڈھالے آج تو

رہ نہ جائے کوئی بھی ترکش میں باقی تیر دیکھ

کام بن بن کر بگڑ جاتے ہیں لاکھوں رات دن

کس قدر ہے مجھ سے برگشتہ مری تقدیر دیکھ

پھر نہ یہ کہنا کہ خط لکھا ہے کس نے غیر کو

لے یہ ہے موجود تیرے ہاتھ کی تحریر دیکھ

ہارنا ہمت دلیل کامیابی سے ہے دور

کام لے تدبیر سے پھر خوبی تقدیر دیکھ

گنبد گردوں سنبھل اے گنبد گردوں سنبھل

کر نہ دے صد پاش تیر آہ پر تاثیر دیکھ

چار دن کی زندگی پر مشت خاک اتنا غرور

پیس دے گا ایک دن یہ آسمان پیر دیکھ

بے بلائے تو نہیں آیا تری محفل میں نازؔ

دیکھ ہاں ہاں دیکھ اپنے ہاتھ کی تحریر دیکھ

kasrat-e-wahdaniyat mein husn ki tanwir dekh

dida-e-haq bin se rang-e-alam-e-taswir dekh

is qadar khinchna nahin achchha but-e-be pir dekh

pyar ki nazron se su-e-ashiq-e-dilgir dekh

ghair ne mujh par sitam dhae hain dhale aj to

rah na jae koi bhi tarkash mein baqi tir dekh

kam ban ban kar bigar jate hain lakhon rat din

kis qadar hai mujh se bargashta miri taqdir dekh

phir na ye kahna ke khat likha hai kis ne ghair ko

le ye hai maujud tere hath ki tahrir dekh

harna himmat dalil-e-kamyabi se hai dur

kam le tadbir se phir khubi-e-taqdir dekh

gumbad-e-gardun sambhal ai gumbad-e-gardun sambhal

kar na de sad pash tir-e-ah par tasir dekh

char din ki zindagi par musht-e-khak itna ghurur

pais dega ek din ye asman-e-pir dekh

be bulae to nahin aya tiri mahfil mein naz

dekh han han dekh apne hath ki tahrir dekh